India's Private Sector: అక్టోబర్‌లో నాలుగు నెలల గరిష్ఠానికి చేరిన భారత్ ప్రైవేట్ రంగ వృద్ధి
ఈ వార్తాకథనం ఏంటి
భారత్‌లో ప్రైవేట్ రంగ కార్యకలాపాలు అక్టోబర్‌లో నాలుగు నెలల గరిష్ఠానికి చేరుకున్నాయి. కొత్త ఆర్డర్లు పెరగడం, ధరల ఒత్తిడి తగ్గడం ఇందుకు ప్రధాన కారణాలుగా నిలిచాయి. తయారీ, సేవల రంగాల పనితీరును సూచించే హెచ్‌ఎస్‌బీసీ ఫ్లాష్ ఇండియా కాంపోజిట్ అవుట్‌పుట్ ఇండెక్స్ సెప్టెంబర్‌లో 55.9గా ఉండగా, అక్టోబర్‌లో 56.7కు పెరిగింది.
వివరాలు
వ్యాపార కార్యకలాపాల్లో గణనీయమైన వృద్ధి
అక్టోబర్‌లో భారత్‌లో వ్యాపార కార్యకలాపాలు గణనీయంగా విస్తరించాయి.
జూన్ తర్వాత ఇదే అత్యంత వేగవంతమైన వృద్ధి అని హెచ్‌ఎస్‌బీసీ సర్వే వెల్లడించింది.
అయితే, 2026లో ఇప్పటివరకు నమోదైన సగటు స్థాయి కంటే ఈ సూచీ ఇంకా తక్కువగానే ఉంది.
వివరాలు
అక్టోబర్‌లో పెరిగిన కొత్త ఆర్డర్లు
అక్టోబర్‌లో కొత్త ఆర్డర్లు వేగంగా పెరిగాయని సర్వే తెలిపింది.
ముఖ్యంగా గత ఆరు నెలల్లో ఎన్నడూ లేనంతగా కొత్త ఎగుమతి ఆర్డర్లు పెరగడం దీనికి తోడ్పడింది.
అమెరికా, బ్రిటన్, పశ్చిమాసియా, బంగ్లాదేశ్ సహా పలు మార్కెట్ల నుంచి కంపెనీలకు ఆర్డర్లు వచ్చాయి. అయితే, ఉద్యోగ నియామకాల వృద్ధి మందగించింది.
ఈ ఏడాదిలో ఇప్పటివరకు అత్యంత నెమ్మదిగా ఉపాధి పెరిగిన నెలగా అక్టోబర్ నిలిచింది. ఉద్యోగుల సంఖ్య స్వల్పంగానే పెరిగింది.
వివరాలు
వరుసగా ఏడో నెలా తగ్గిన ఉత్పత్తి వ్యయాల ద్రవ్యోల్బణం
అక్టోబర్‌లో ధరల పెరుగుదల ఒత్తిడి మరింత తగ్గిందని సర్వే వెల్లడించింది.
ఉత్పత్తికి అవసరమైన ముడిసరుకులు, ఇతర వస్తువుల కొనుగోలు వ్యయాల పెరుగుదల వరుసగా ఏడో నెల కూడా నెమ్మదించింది.
దాదాపు ఏడాది కాలంలోనే ఇది అత్యల్ప స్థాయికి చేరింది. తయారీ, సేవల రంగాల్లోనూ ఈ పరిస్థితి కనిపించింది.
అయితే, ఉక్కు, రవాణా ఖర్చులు ఇంకా వ్యయాల పెరుగుదలకు కారణమవుతున్నాయి. వస్తువులు, సేవల విక్రయ ధరల పెరుగుదల కూడా తగ్గింది.
మార్చి 2025 తర్వాత విక్రయ ధరలు అత్యంత నెమ్మదిగా పెరిగిన నెలగా అక్టోబర్ నిలిచింది.