స్టార్‌బక్స్ సీఈఓగా బాధ్యతలు స్వీకరించిన భారతీయ మూలాలు ఉన్న లక్ష్మణ్ నరసింహన్
గత ఏడాది సెప్టెంబర్‌లో, నరసింహన్ కంపెనీ తదుపరి చీఫ్ ఎగ్జిక్యూటివ్ ఆఫీసర్, స్టార్‌బక్స్ బోర్డ్ ఆఫ్ డైరెక్టర్స్ సభ్యుడు అవుతారని స్టార్‌బక్స్ ప్రకటించింది. భారతీయ సంతతికి చెందిన ఎగ్జిక్యూటివ్ లక్ష్మణ్ నరసింహన్ సోమవారం అధికారికంగా స్టార్‌బక్స్ చీఫ్ ఎగ్జిక్యూటివ్ ఆఫీసర్ బాధ్యతలు స్వీకరించారు. దీనితో లక్ష్మణ్ కూడా గ్లోబల్ కార్పొరేషన్ల అధికారంలో భారతీయ నాయకులు ఉన్న లిస్ట్ లో చేరారు. కంపెనీ వ్యవస్థాపకుడు, మాజీ సిఈఓ హోవార్డ్ షుల్ట్జ్ తర్వాత స్టార్‌బక్స్ కొత్త నాయకుడి కోసం చాలా అన్వేషిస్తుండగా, నరసింహన్ లండన్ నుండి సీటెల్ ప్రాంతానికి మకాం మార్చిన తర్వాత అక్టోబర్ 1, 2022న ఇన్‌కమింగ్ సిఈఓగా స్టార్‌బక్స్‌లో చేరారు. మార్చి 23న స్టార్‌బక్స్ వార్షిక వాటాదారుల సమావేశానికి నరసింహన్ నాయకత్వం వహిస్తారు.
నరసింహన్ స్టార్‌బక్స్‌కు దాదాపు 30 సంవత్సరాల అనుభవాన్ని అందించారు
నరసింహన్, స్టార్‌బక్స్‌కు దాదాపు 30 సంవత్సరాల అనుభవాన్ని అందించారు. ప్రపంచ వినియోగ వస్తువుల వ్యాపారాలకు నాయకత్వం వహిస్తున్నారు. రిటైల్, కిరాణా, రెస్టారెంట్, ఇ-కామర్స్ కంపెనీలకు సలహాదారుగా ఉన్నారు. గత ఐదు నెలలుగా, అతను 30కి పైగా దుకాణాలు, తయారీ ప్లాంట్లు, ప్రపంచవ్యాప్తంగా ఉన్న సహాయక కేంద్రాలలో ఉద్యోగులతో కలిసి పని చేయడాన్ని ప్రారంభించారని కంపెనీ తెలిపింది. నరసింహన్ భారతదేశంలోని పూణే విశ్వవిద్యాలయంలోని కాలేజ్ ఆఫ్ ఇంజనీరింగ్ నుండి మెకానికల్ ఇంజనీరింగ్‌లో డిగ్రీని పొందారు. అతను పెన్సిల్వేనియా విశ్వవిద్యాలయంలోని లాడర్ ఇన్స్టిట్యూట్ నుండి జర్మన్ ఇంటర్నేషనల్ స్టడీస్‌లో మాస్టర్ ఆఫ్ ఆర్ట్స్, ది వార్టన్ స్కూల్ ఆఫ్ ది యూనివర్సిటీ ఆఫ్ పెన్సిల్వేనియా నుండి ఫైనాన్స్‌లో మాస్టర్ ఆఫ్ బిజినెస్ అడ్మినిస్ట్రేషన్ పట్టాలు సంపాదించారు.
