Intel: ఉద్యోగులకు షాక్ ఇచ్చిన చిప్ తయారీ సంస్థ ఇంటెల్.. 5వేల మంది తొలగింపు
ఈ వార్తాకథనం ఏంటి
ప్రపంచవ్యాప్తంగా టెక్ పరిశ్రమలో ఉద్యోగాల కోత కొనసాగుతోంది. ఆర్థిక అస్థిరతతో గ్లోబల్‌ మార్కెట్లలో ఒత్తిడి, లాభాల క్షీణత, ఏఐ వినియోగం పెరగడం.. వెరసి కంపెనీలు ఖర్చులు తగ్గించుకునేందుకు ప్రయత్నిస్తున్నాయి. ఈ క్రమంలో పెద్దఎత్తున ఉద్యోగులను తొలగిస్తూ ఉన్నాయి. తాజాగా,ప్రఖ్యాత చిప్ తయారీ సంస్థ అయిన ఇంటెల్(Intel)తమ ఉద్యోగులకు షాక్ ఇచ్చింది. ఈ వారంలో 5 వేల మందికి పైగా ఉద్యోగులను తొలగించనున్నట్లు కంపెనీ అధికారికంగా ప్రకటించింది. ఇటీవలి వరకు ఇంటెల్ 4 వేల మందిని తొలగించనుందని అంచనాలు వచ్చాయి. అయితే తాజాగా సంస్థ విడుదల చేసిన ప్రకటనలో 4 వేల మంది కాదు, 5 వేల మందిని తొలగించనున్నట్లు స్పష్టం చేసింది. అమెరికా వ్యాప్తంగా ఈ వారంలోనే ఈ ఉద్యోగులను తొలగించనున్నట్లు వెల్లడించింది.
వివరాలు
అరిజోనాలో కార్యాలయం నుంచి 696 మంది ఉద్యోగులపై లేఆఫ్ వేటు
కంపెనీ ఖర్చులు తగ్గించుకోవడంలో భాగంగా ఈ నిర్ణయం తీసుకున్నట్లు పేర్కొంది. ముఖ్యంగా ఒరెగాన్, కాలిఫోర్నియాలో ఎక్కువగా ఉద్యోగ కోతలు అమలులోకి రానున్నట్లు వివరించింది. కాలిఫోర్నియాలోని తమ కార్యాలయాల నుంచి 1,935 మందిని, ఒరెగాన్ యూనిట్ నుంచి 2,392 మందిని తొలగించనున్నట్లు సమాచారం. అదేవిధంగా, అరిజోనాలో ఉన్న కార్యాలయం నుంచి 696 మంది ఉద్యోగులపై లేఆఫ్ వేటు పడనున్నట్లు తెలుస్తోంది. ఈ ఏడాది మార్చిలో లిప్-బు టాన్ (Lip-Bu Tan) ఇంటెల్ కొత్త సీఈఓగా బాధ్యతలు చేపట్టిన సంగతి తెలిసిందే. ఆయన నేతృత్వంలో సంస్థ భారీ స్థాయిలో పునర్వ్యవస్థీకరణ చేపడుతోంది. ఉద్యోగుల్లో 20 శాతానికి పైగా తగ్గించాలన్న ఆలోచనతో ముందుకెళ్తోంది. ఈ వ్యూహం ప్రకారమే తాజా లేఆఫ్ ప్రకటన చేసింది.