Livspace: లివ్స్పేస్ లో వరుస షాకులు.. సీబీఓ రాజీనామా,వెయ్యి మందికి పైగా ఉద్యోగాల కోత
ఈ వార్తాకథనం ఏంటి
బెంగళూరుకు చెందిన ప్రముఖ హోమ్ ఇంటీరియర్స్ ప్లాట్ఫామ్ లివ్స్పేస్(Livspace)లో వరుసగా కీలక పరిణామాలు చోటుచేసుకుంటున్నాయి. ఇప్పటికే వెయ్యికి పైగా ఉద్యోగులను ఖర్చు తగ్గింపు చర్యల పేరుతో తొలగించిన సంస్థలో తాజాగా చీఫ్ బిజినెస్ ఆఫీసర్(CBO)లలిత్ మిట్టల్ రాజీనామా చేశారు. ఆరు సంవత్సరాలుగా సంస్థలో కీలక బాధ్యతలు నిర్వహించిన ఆయన నెలక్రితమే బయటకు వెళ్లినట్లు కంపెనీ ధృవీకరించింది. "ఆయన నేతృత్వంలో వ్యాపారం నాలుగు రెట్లు పెరిగింది.ఇప్పుడు స్వంతవ్యాపార ప్రయాణం ప్రారంభించాలనే నిర్ణయం తీసుకున్నారు"అని సంస్థ ప్రతినిధి వెల్లడించారు. ఇదే సమయంలో,భారత్ సీఈఓగా ఉన్న సహ వ్యవస్థాపకుడు సౌరభ్ జైన్(Saurabh Jain)కూడా తన పదవికి రాజీనామా చేస్తున్నట్లు ఇటీవల ప్రకటించడం గమనార్హం. 2022లో జైన్ భారత్ సీఈఓగా బాధ్యతలు చేపట్టిన తర్వాత మిట్టల్ను సీబీఓగా నియమించారు.
వివరాలు
కోత్త వ్యాపారం ప్రారంభించనున్నట్లు సంకేతాలు ఇచ్చిన జైన్
ప్రస్తుతం ఆయన స్థానాన్ని ఎవరు భర్తీ చేస్తారన్నది స్పష్టత రాలేదు. అయితే ఈ మార్పులను సంస్థ "అభివృద్ధి దిశగా సహజ పరిణామం"గా అభివర్ణిస్తూ ఆందోళన అవసరం లేదని చెబుతోంది. మరోవైపు,రమాకాంత్ శర్మ,అనుజ్ శ్రీవాస్తవ(Ramakant Sharma, Anuj Srivastava)లతో కలిసి కంపెనీని స్థాపించిన జైన్ 11 సంవత్సరాలకు పైగా సేవలందించిన అనంతరం కొత్త వ్యాపారం ప్రారంభించనున్నట్లు సంకేతాలు ఇచ్చారు. ఈ మార్పుల మధ్య కూడా సంస్థ ఆర్థికంగా కొంత మెరుగుదల సాధించింది. 2025 ఆర్థిక సంవత్సరంలో అమ్మకాలు 23 శాతం పెరిగి రూ.1,460 కోట్లకు చేరగా,నష్టాలు రూ.416 కోట్ల నుంచి రూ.242 కోట్లకు తగ్గినట్లు కంపెనీ వెల్లడించింది. AI ఆధారిత విధానాలతో కార్యకలాపాల సామర్థ్యాన్ని పెంచడమే లక్ష్యంగా చర్యలు కొనసాగుతున్నాయని సంస్థ వర్గాలు చెబుతున్నాయి.