Ola Electric layoffs: పునర్వ్యవస్థీకరణలో భాగంగా 500 ఉద్యోగులను తొలగించిన ఓలా ఎలక్ట్రిక్
ఈ వార్తాకథనం ఏంటి
ఓలా ఎలక్ట్రిక్ ఉద్యోగులకు భారీ షాక్‌ ఇచ్చింది. సంస్థ పునర్వ్యవస్థీకరణ చర్యల్లో భాగంగా 500 మందిని లేఆఫ్‌ చేసినట్లు సమాచారం. వివిధ విభాగాల్లో పనిచేస్తున్న ఉద్యోగులను దశలవారీగా తొలగిస్తున్నట్లు సంబంధిత వర్గాలు తెలిపాయి. ఈ నిర్ణయం విక్రయానంతర సేవలపై వస్తున్న విమర్శలతో పాటు కంపెనీ మార్జిన్లు, లాభదాయకతను పెంపొందించుకోవడంపై దృష్టి సారించడం అనే ఉద్దేశంతో తీసుకున్నట్లు తెలుస్తోంది. ఈ తొలగింపు ప్రక్రియ జులై నెల నుంచి ప్రారంభమై ఇప్పటివరకు కొనసాగుతుందని, ఈ నెలాఖరుకల్లా పూర్తి కావచ్చని తెలుస్తోంది. కంపెనీ ప్రస్తుతం ఉన్న శ్రామికశక్తిని మరింత సమర్థవంతంగా వినియోగించి, వ్యయ నియంత్రణ లక్ష్యాలను సాధించడానికి చర్యలు తీసుకుంటోంది.
వివరాలు
99 శాతం సమస్యలను పరిష్కరించాము: ఓలా
ఇటీవల ఓలా ఎలక్ట్రిక్‌పై వినియోగదారుల నుండి పెద్ద ఎత్తున ఫిర్యాదులు రావడం గమనార్హం. సుమారు 10,000 ఫిర్యాదులు రావడంతో సీసీపీఏ సంస్థ ఈ అంశంపై నోటీసులు జారీ చేసింది. దీనిపై స్పందించిన కంపెనీ 99 శాతం సమస్యలను పరిష్కరించామని పేర్కొంది. అయినప్పటికీ, సీసీపీఏ సమగ్ర దర్యాప్తునకు ఆదేశించింది. కాగా, ఎన్‌ఎస్‌ఈలో ఓలా ఎలక్ట్రిక్ షేర్లు స్వల్ప లాభంతో రూ.68 వద్ద కొనసాగుతున్నాయి.