RBI: ఆర్‌బీఐ కొత్త డిప్యూటీ గవర్నర్‌గా పూనమ్ గుప్తా నియామకం.. ఎన్‌ఎస్‌డీఎల్‌కు సెబీ రిలీఫ్
ఈ వార్తాకథనం ఏంటి
ఎన్‌సీఏఈఆర్ (NCAER) డైరెక్టర్ జనరల్‌గా ఉన్న పూనమ్ గుప్తా (Poonam Gupta)ను రిజర్వ్ బ్యాంక్ ఆఫ్ ఇండియా (RBI) డిప్యూటీ గవర్నర్‌గా కేంద్ర ప్రభుత్వం నియమించింది. ఈ పదవిలో ఆమె మూడేళ్ల పాటు కొనసాగనున్నారు. ఈ తాజా నియామకాన్ని నియామకాల కేబినెట్ కమిటీ ఆమోదించిందని సంబంధిత వర్గాలు వెల్లడించాయి. డిప్యూటీ గవర్నర్‌గా వ్యవహరించిన ఎండీ పాత్రా ఈ ఏడాది జనవరిలో పదవీ విరమణ చేయడంతో ఆ స్థానం ఖాళీగా ఉంది. అయితే, ద్రవ్య పరపతి విధాన కమిటీ (MPC) సమావేశానికి ముందు ఈ కీలకమైన నియామకం జరిగింది.
వివరాలు
ఎన్‌ఎస్‌డీఎల్‌కు ఉపశమనం: ఐపీఓ గడువు పెంపు
భారత మార్కెట్ నియంత్రణ సంస్థ సెబీ (SEBI) నుంచి డిపాజిటరీ సంస్థ ఎన్ఎస్డీఎల్ (NSDL)కు ఊరట లభించింది. సాధారణంగా, ఈ నెల చివరి నాటికి ఐపీఓ ద్వారా రూ.3వేల కోట్లు సమీకరించాల్సిన అవసరం ఉండగా, సెబీ తాజాగా గడువును ఈ ఏడాది జులై వరకు పొడిగించింది. ఒక సంవత్సరం పాటు సెబీ అనుమతి ఉన్న నేపథ్యంలో, పబ్లిక్ ఇష్యూ కోసం మరింత సమయం కావాలని ఎన్ఎస్డీఎల్ కోరింది. దాన్ని పరిశీలించిన సెబీ, ఈ మేరకు గడువు పెంచుతున్నట్లు ప్రకటించింది.
వివరాలు
ఐపీఓకు సన్నద్ధమవుతున్న కొత్త కంపెనీలు
పార్క్ మెడి వరల్డ్ లిమిటెడ్, జైన్ రిసోర్స్ రీసైక్లింగ్ లిమిటెడ్, ప్రోజీల్ గ్రీన్ ఎనర్జీ లిమిటెడ్ సంస్థలు తమ ప్రాథమిక షేర్ల విక్రయానికి (IPO) సిద్ధమవుతున్నాయి. ఈ ప్రక్రియలో భాగంగా, ఈ కంపెనీలు మార్కెట్ నియంత్రణ సంస్థ సెబీకి ముసాయిదా పత్రాలను సమర్పించాయి.