Stock Market: స్టాక్ మార్కెట్లో భారీ పతనం.. 1,000 పాయింట్లకు పైగా పడిపోయిన సెన్సెక్స్
ఈ వార్తాకథనం ఏంటి
దేశీయ స్టాక్ మార్కెట్లలో అమ్మకాల ఒత్తిడి కొనసాగుతోంది. శుక్రవారం ఉదయం లాభాలతో ప్రారంభమైన సూచీలు కొద్దిసేపటికే నష్టాల్లోకి జారుకున్నాయి. సెన్సెక్స్ గరిష్ఠ స్థాయి నుంచి 1,000 పాయింట్లకు పైగా పడిపోయింది. మరోవైపు నిఫ్టీ 22,500 పాయింట్ల దిగువకు చేరింది. ముఖ్యంగా మిడ్ క్యాప్, స్మాల్ క్యాప్ షేర్లలో వరుసగా అమ్మకాలు జరుగుతుండటంతో ఈ విభాగాలకు చెందిన సూచీలు భారీగా నష్టపోతున్నాయి.
వివరాలు
మార్కెట్లపై ఒత్తిడి పెరగడానికి ప్రధాన కారణం
మార్కెట్లపై ఒత్తిడి పెరగడానికి ప్రధాన కారణాల్లో ముడి చమురు ధరల పెరుగుదల ఒకటి.
అంతర్జాతీయ మార్కెట్లో బ్రెంట్ క్రూడ్ ఆయిల్ ధర బ్యారెల్‌కు 113డాలర్లకు పైగా చేరడం మదుపరుల్లో ఆందోళనకు కారణమవుతోంది.
సౌదీ అరేబియాపై హౌతీ దాడుల నేపథ్యంలో ఇంధన సరఫరాకు అంతరాయాలు ఏర్పడవచ్చనే భయాలు పెరిగాయి.
దీంతో పెట్టుబడిదారులు అప్రమత్తంగా వ్యవహరిస్తున్నారు. నిఫ్టీ 50 సూచీలోని కొన్ని ప్రముఖ కంపెనీల షేర్లు పడిపోవడం కూడా ప్రధాన సూచీలపై ప్రభావం చూపుతోంది.
ప్రధాన సూచీలతో పోలిస్తే మిడ్ క్యాప్, స్మాల్ క్యాప్ షేర్లలో అమ్మకాల ఒత్తిడి మరింత ఎక్కువగా కనిపిస్తోంది.
నిఫ్టీ స్మాల్ క్యాప్ 100 సూచీ 3 శాతానికి పైగా పతనమైంది. మిడ్ క్యాప్ సూచీలు సుమారు 1.4 శాతం నష్టపోయాయి.
వివరాలు
రూ.1,022 కోట్ల విలువైన షేర్లను కొనుగోలు చేసిన FII
దీంతో ఈ విభాగాల్లో పెట్టుబడులు పెట్టిన మదుపరులు ఆందోళనకు గురవుతున్నారు.
మరోవైపు, మార్కెట్లలో అమ్మకాల ఒత్తిడి కొనసాగుతున్నప్పటికీ విదేశీ సంస్థాగత పెట్టుబడిదారులు (FII) గురువారం భారత స్టాక్ మార్కెట్లో నికరంగా రూ.1,022 కోట్ల విలువైన షేర్లను కొనుగోలు చేశారు.
దేశీయ సంస్థాగత పెట్టుబడిదారులు (DII) సైతం రూ.1,614 కోట్ల నికర కొనుగోళ్లు జరిపారు. అయినప్పటికీ శుక్రవారం మార్కెట్లు నష్టాల బాట పట్టాయి.
అంతర్జాతీయ పరిణామాలు, ముడి చమురు ధరల కదలికలు, షేర్లలో కొనసాగుతున్న అమ్మకాల ఒత్తిడి మార్కెట్ దిశను ప్రభావితం చేస్తున్నాయి.