Smart Investment Tips: మీ దగ్గర ఎంత డబ్బునా...రిస్క్‌లేకుండా ఇలా పెట్టుబడి పెట్టండి
ఈ వార్తాకథనం ఏంటి
ఒక కుటుంబం పిల్లల చదువు కోసం కొంత డబ్బు దాచుకుంటుంది. మరోవైపు ఇంటి ఖర్చులు, వైద్య అవసరాలు, భవిష్యత్తులో సొంత కారు కొనాలనే ఆశయం కూడా ఉంటాయి. ఈ అవసరాలన్నింటికీ ఒకే చోట పెట్టుబడి పెడితే మార్కెట్‌లో ఒడుదొడుకులు వచ్చినప్పుడు ఇబ్బందులు ఎదురవుతాయి. అందుకే ఎంత డబ్బు పెట్టుబడి పెడుతున్నామన్నది మాత్రమే కాదు.. దేనికోసం పెడుతున్నామన్నది కూడా ముఖ్యం. ఆర్థిక లక్ష్యాలను బట్టి రిస్క్‌ను విభజించుకోవడమే మెరుగైన పెట్టుబడి ప్రణాళికకు మొదటి అడుగు.
Details
అత్యవసర డబ్బుకు అధిక రాబడి అవసరం లేదు
ఇంటి అద్దె, నెలవారీ ఖర్చులు, వైద్య అవసరాలు వంటి వాటికి ఎప్పుడు డబ్బు అవసరమవుతుందో చెప్పలేం.
అందుకే ఇలాంటి అవసరాల కోసం ప్రత్యేకంగా అత్యవసర నిధిని ఏర్పాటు చేసుకోవాలి. పొదుపు ఖాతాలు, లిక్విడ్ ఫండ్స్ వంటి తక్కువ రిస్క్ సాధనాలను పరిశీలించవచ్చు.
ఇక్కడ ప్రధాన లక్ష్యం ఎక్కువ లాభం సంపాదించడం కాదు.. అవసరమైనప్పుడు డబ్బును సులభంగా వెనక్కి తీసుకునే వెసులుబాటు ఉండటం. అత్యవసర నిధిని షేర్ల వంటి ఒడుదొడుకులు ఎక్కువగా ఉండే పెట్టుబడుల్లో పెట్టకూడదు.
Details
ఆశయాలకు దీర్ఘకాలిక పెట్టుబడులు
లగ్జరీ కారు కొనడం, ముందుగానే ఉద్యోగ విరమణ చేయడం వంటి లక్ష్యాలకు కొంత సమయం ఉంది.
అందువల్ల ఇలాంటి దీర్ఘకాలిక అవసరాల కోసం ఈక్విటీ, స్మాల్‌క్యాప్, అంతర్జాతీయ మార్కెట్ ఫండ్స్ వంటి పెట్టుబడి మార్గాలను పరిశీలించవచ్చు.
అయితే వీటిలో లాభాలకు హామీ ఉండదు. మార్కెట్ పడిపోయినప్పుడు పెట్టుబడి విలువ కూడా తగ్గవచ్చు. కాబట్టి నష్టాలను తట్టుకునే సామర్థ్యం, పెట్టుబడిని కొనసాగించగలిగే సమయం ఉన్నప్పుడే అధిక రిస్క్ తీసుకోవాలి.
Details
పిల్లల చదువు వంటి లక్ష్యాలకు సమతుల్యత
పిల్లల ఉన్నత విద్య, ఇంటి కొనుగోలు వంటి తప్పనిసరి లక్ష్యాలకు మరీ ఎక్కువ రిస్క్ తీసుకోవడం మంచిది కాదు.
బ్యాలెన్స్‌డ్ అడ్వాంటేజ్ ఫండ్స్, నిఫ్టీ 50 ఇండెక్స్ ఫండ్స్ వంటి మార్గాలను వ్యక్తిగత ఆర్థిక పరిస్థితిని బట్టి పరిశీలించవచ్చు.
సాధారణంగా మూడేళ్లలోపు అవసరాలకు తక్కువ రిస్క్, మూడు నుంచి ఏడేళ్ల లక్ష్యాలకు మితమైన రిస్క్, ఏడేళ్లకు మించిన లక్ష్యాలకు కొంత అధిక రిస్క్ విధానాన్ని పరిగణనలోకి తీసుకోవచ్చు.
లక్ష్యానికి గడువు దగ్గరపడుతున్న కొద్దీ పెట్టుబడులను సురక్షితమైన సాధనాల వైపు మళ్లించాలి.
Details
ఏడాదికోసారి పెట్టుబడులపై సమీక్ష
పెట్టుబడి పెట్టి వదిలేయడం సరైన పద్ధతి కాదు. కనీసం ఏడాదికోసారి లక్ష్యాలు, ఆదాయం, ఖర్చులు, పెట్టుబడుల కేటాయింపులను సమీక్షించాలి.
ఉద్యోగం కోల్పోవడం, కుటుంబ బాధ్యతలు పెరగడం, పిల్లల చదువు ఖర్చులు దగ్గరపడటం వంటి మార్పులు వచ్చినప్పుడు ప్రణాళికను సవరించాలి. ప్రతి లక్ష్యానికి ప్రత్యేక ఫోలియో లేదా ఖాతా నిర్వహిస్తే డబ్బు ఎక్కడికి వెళ్తుందో స్పష్టంగా తెలుస్తుంది.
పూర్తిగా రిస్క్ లేని పెట్టుబడి అని ఏ సాధనాన్నీ భావించకూడదు. పెట్టుబడికి ముందు నిబంధనలు, నష్టభయం తెలుసుకుని నిర్ణయం తీసుకోవడం ముఖ్యం.