Under-19: అండర్-19 ఆసియా కప్‌కు టీమిండియా ప్రకటన.. సచిన్, ద్రవిడ్, సెహ్వాగ్ వారసులకు చోటు!
ఈ వార్తాకథనం ఏంటి
ఒమన్ రాజధాని మస్కట్‌లో నవంబర్ 5 నుంచి 14 వరకు జరగనున్న ఏసీసీ పురుషుల అండర్-19 ఆసియా కప్ టోర్నీ కోసం భారత జట్టును జూనియర్ క్రికెట్ సెలెక్షన్ కమిటీ ప్రకటించింది. ఈ టోర్నీలో టీమిండియాకు లక్ష్య రాయ్‌చందానీ కెప్టెన్‌గా వ్యవహరించనున్నాడు. యశ్‌వర్ధన్ సింగ్ చౌహాన్ వైస్ కెప్టెన్‌గా ఎంపికయ్యాడు. ఈ జట్టులో భారత క్రికెట్ దిగ్గజం రాహుల్ ద్రవిడ్ కుమారుడు అన్వయ్ ద్రవిడ్, మాజీ డాషింగ్ ఓపెనర్ వీరేందర్ సెహ్వాగ్ కుమారుడు ఆర్యవీర్ సెహ్వాగ్ చోటు దక్కించుకోవడం విశేషం. వికెట్ కీపర్లుగా అన్వయ్ ద్రవిడ్, రజత్ బఘేల్ ఎంపికయ్యారు.
వివరాలు
గ్రూప్-ఎలో భారత్.. తొలి మ్యాచ్ నేపాల్‌తో
వీరితో పాటు వి.కె. వినీత్, కుషాగ్ర ఓఝా, అర్జున్ రాజ్‌పుత్, మణాల్ చౌహాన్, వి. యష్‌వీర్, ఆర్యన్ సావసాని, మోహిత్ ఉల్వా, కావ్య పటేల్, షవిన్ వినోద్, ఇషాన్ సూద్‌లకు కూడా జట్టులో స్థానం లభించింది.
ఈ టోర్నీలో భారత్ గ్రూప్-ఎలో చోటు దక్కించుకుంది. ఈ గ్రూప్‌లో డిఫెండింగ్ ఛాంపియన్ పాకిస్తాన్‌తో పాటు యూఏఈ, నేపాల్ జట్లు ఉన్నాయి.
మరోవైపు గ్రూప్-బిలో బంగ్లాదేశ్, శ్రీలంక, అఫ్గానిస్తాన్, మలేషియా జట్లు పోటీపడనున్నాయి. గ్రూప్ దశలో భారత జట్టు తన తొలి మ్యాచ్‌ను నవంబర్ 6న నేపాల్‌తో ఆడనుంది.
ఆ తర్వాత నవంబర్ 8న చిరకాల ప్రత్యర్థి పాకిస్తాన్‌తో తలపడుతుంది. నవంబర్ 10న యూఏఈతో చివరి గ్రూప్ మ్యాచ్ ఆడనుంది.
వివరాలు
నవంబర్ 14న ఫైనల్ పోరు
ఈ మ్యాచ్‌లన్నీ మస్కట్‌లోని ఒమన్ క్రికెట్ అకాడమీ గ్రౌండ్‌లో నిర్వహించనున్నారు.
రెండు గ్రూపుల్లోనూ మొదటి రెండు స్థానాల్లో నిలిచిన జట్లు నవంబర్ 12న జరిగే సెమీఫైనల్స్‌కు అర్హత సాధిస్తాయి.
టోర్నీ విజేతను నిర్ణయించే ఫైనల్ మ్యాచ్ నవంబర్ 14న శనివారం జరగనుంది. యువ భారత క్రికెటర్లు తమ ప్రతిభను నిరూపించుకోవడానికి ఈ ఆసియా కప్ మంచి వేదికగా నిలవనుంది.
ముఖ్యంగా రాహుల్ ద్రవిడ్, వీరేందర్ సెహ్వాగ్ కుమారులైన అన్వయ్ ద్రవిడ్, ఆర్యవీర్ సెహ్వాగ్ ఈ టోర్నీలో ఎలాంటి ప్రదర్శన చేస్తారనే అంశంపై అభిమానుల్లో ఆసక్తి నెలకొంది.