Swiggy Q1 results: స్విగ్గీ త్రైమాసిక నష్టం రూ.791 కోట్లు.. ఆదాయంలో 37% వృద్ధి

వ్రాసిన వారు Sirish Praharaju

Jul 30, 2026

05:29 pm

ఈ వార్తాకథనం ఏంటి

స్విగ్గీ ప్రస్తుత ఆర్థిక సంవత్సరం తొలి త్రైమాసికం (ఏప్రిల్-జూన్) ఆర్థిక ఫలితాలను ప్రకటించింది. ఈ కాలంలో కంపెనీ రూ.791 కోట్ల నికర నష్టాన్ని నమోదు చేసింది. గత ఆర్థిక సంవత్సరం ఇదే త్రైమాసికంలో నమోదైన రూ.1,197 కోట్ల నష్టంతో పోలిస్తే, ఈసారి నష్టం తగ్గడం విశేషం. అయితే, కంపెనీ ఆదాయంలో గణనీయమైన వృద్ధిని నమోదు చేసింది. కార్యకలాపాల ద్వారా వచ్చిన ఆదాయం వార్షిక ప్రాతిపదికన 37 శాతం పెరిగి రూ.6,182 కోట్లకు చేరింది. గత ఏడాది ఇదే కాలంలో ఈ ఆదాయం రూ.4,961 కోట్లు మాత్రమే. సమీక్షా త్రైమాసికంలో కంపెనీ మొత్తం ఆదాయం రూ.7,023 కోట్లుగా నమోదైంది.

వివరాలు

ఫుడ్ డెలివరీ విభాగం ఆదాయం రూ.2,208 కోట్లు

అదే సమయంలో, సంస్థ మొత్తం వ్యయాలు కూడా పెరిగాయి. గత ఏడాదితో పోలిస్తే 25 శాతం అధికమై రూ.7,813 కోట్లకు చేరినట్లు స్విగ్గీ తన రెగ్యులేటరీ ఫైలింగ్‌లో వెల్లడించింది.

సంస్థ ఫుడ్ డెలివరీ విభాగం మాత్రం బలమైన పనితీరును కనబరిచింది. ఈ విభాగం ద్వారా 48 శాతం వృద్ధితో రూ.299 కోట్ల నికర లాభాన్ని నమోదు చేసింది.

ఫుడ్ డెలివరీ విభాగం ఆదాయం కూడా 23 శాతం పెరిగి రూ.2,208 కోట్లకు చేరింది.

వివరాలు

ఇన్‌స్టామార్ట్ ఆదాయం రూ.1,232 కోట్లు

మరోవైపు, స్విగ్గీ క్విక్ కామర్స్ సేవ ఇన్‌స్టామార్ట్ ఇంకా నష్టాల్లోనే కొనసాగుతోంది. ఈ విభాగం రూ.651 కోట్ల నికర నష్టాన్ని ప్రకటించింది.

అయినప్పటికీ, ఇన్‌స్టామార్ట్ ఆదాయం 53 శాతం పెరిగి రూ.1,232 కోట్లకు చేరడం గమనార్హం.

విస్తరణ వ్యూహంలో భాగంగా సమీక్షా త్రైమాసికంలో ఇన్‌స్టామార్ట్ మరో 28 డార్క్ స్టోర్లను ప్రారంభించింది.

దీంతో దేశవ్యాప్తంగా ఇన్‌స్టామార్ట్ నిర్వహిస్తున్న మొత్తం డార్క్ స్టోర్ల సంఖ్య 1,171కు చేరింది.