బ్రిటన్‌కు ఉపయోగపడే వాణిజ్య ఒప్పందాన్ని మాత్రమే భారత్‌తో అంగీకరిస్తా: రిషి సునక్
ఈ వార్తాకథనం ఏంటి
భారత్‌తో జరిగే స్వేచ్ఛా వాణిజ్య ఒప్పందం (ఎఫ్‌టీఏ) చర్చలపై బ్రిటన్ ప్రధాని రిషి సునక్ కీలక వ్యాఖ్యలు చేశారు. వాణిజ్య ఒప్పందంపై చర్చలు పురోగతిలో ఉన్నాయని చెప్పారు.
యూకే మొత్తానికి ఉపయోగపడే ఒప్పందానికి మాత్రమే తాను అంగీకరిస్తానని ప్రధానమంత్రి రిషి సునక్ పేర్కొన్నారు.
ఈ వారం దిల్లీలో జరిగే జీ20 వరల్డ్ లీడర్స్ సమ్మిట్‌కు వెళ్లనున్నారు. ఈ క్రమంలో భారత్‌తో జరిగే వాణిజ్య చర్చల గురించి సునక్ తన కేబినెట్ సమావేశంలో చర్చించారు.
ద్వైపాక్షిక సహకారంతో పాటు యూకేకు భారత్ నమ్మదగ్గ భాగస్వామి అని, ఇరు దేశాల మధ్య బంధాన్ని మరింత బలోపేతం చేయడానికి కృషి చేస్తానని సునక్ ఈ సందర్భంగా చెప్పారు.
రిషి
భారత్-బ్రిటన్ వాణిజ్య భాగస్వామ్యం 36 బిలియన్ డాలర్లు
ఇప్పటికే బ్రిటన్- భారత్ మధ్య వాణిజ్య చర్చలు 12 దఫాలు జరిగాయి. గత నెలలో కూడా దిల్లీలో భారత వాణిజ్య, పరిశ్రమల మంత్రి పీయూష్ గోయల్‌తో యూకే వ్యాపార, వాణిజ్య కార్యదర్శి కెమీ బాడెనోచ్ చర్చలు జరిపారు.
ఈ చర్చల సారాంశాన్ని కెమీ బాడెనోచ్ కేబినెట్‌కు వివరించారు.
యూకే అతిపెద్ద వాణిజ్య భాగస్వామి భారత్ అని రిషి సునక్ అన్నారు. ప్రస్తుతం ఇరు దేశాల మధ్య వాణిజ్య భాగస్వామ్యం 36 బిలియన్ డాలర్లుగా ఉందని పేర్కొన్నారు.
భారత్‌తో వాణిజ్యం, రక్షణ, సాంకేతికత రంగాల్లో శాశ్వతమైన, బలమైన భాగస్వామ్యాన్ని నెలకొల్పాల్సిన అవసరం ఉందని సునక్ నొక్కి చెప్పారు.
ఇరు దేశాల భాగస్వామ్యం రాబోయే దశాబ్దాలపాటు యూకే ప్రజలకు ప్రయోజనం చేకూరుస్తుందని ఆయన వివరించారు.