UPI: మలేసియాలో త్వరలో యూపీఐ చెల్లింపులు
ఈ వార్తాకథనం ఏంటి
భారత్-మలేషియా మధ్య డిజిటల్ చెల్లింపుల రంగంలో కీలక ముందడుగు పడనుంది. NPCI International Payments Limited,మలేసియాలోని Payments Network Malaysia మధ్య కుదిరిన ఒప్పందంతో, భారత్ యూపీఐ వ్యవస్థను మలేసియాలోని డ్యూట్నౌతో అనుసంధానించనున్నారు. ముంబైలో గురువారం(ఫిబ్రవరి 12, 2026) ప్రకటించిన ఈ ఒప్పందాన్ని దశలవారీగా అమలు చేయనుండగా, పూర్తి గడువు మాత్రం వెల్లడించలేదు. తొలి దశలో మలేసియా వెళ్లే భారతీయులు అక్కడ డ్యూట్నౌ క్యూ ఆర్ కోడ్ ఉన్న దుకాణాలు, హోటళ్లు, రెస్టారెంట్లు, పర్యాటక కేంద్రాల్లో తమ యూపీఐ యాప్లతో చెల్లింపులు చేయగలుగుతారు. తదుపరి దశలో భారత్కు వచ్చే మలేసియా పర్యాటకులు యూపీఐ క్యూ ఆర్ కోడ్లను స్కాన్ చేసి తమ డ్యూట్నౌ యాప్లతో చెల్లింపులు చేయవచ్చు.
వివరాలు
రెండు దేశాల మధ్య డిజిటల్, ఆర్థిక సంబంధాలు
ఈ అనుసంధానంతో మలేసియాలో ఉన్న లక్షలాది డ్యూట్నౌ క్యూ ఆర్ కేంద్రాలు భారతీయులకు అందుబాటులోకి రానుండగా, భారత్లోని లక్షలాది యూపీఐ వ్యాపార కేంద్రాల్లో మలేసియా ప్రయాణికులకు చెల్లింపుల సౌలభ్యం లభించనుంది. ప్రభుత్వ మార్గదర్శకాలు, Reserve Bank of India పర్యవేక్షణలో ఈ భాగస్వామ్యం యూపీఐని అంతర్జాతీయ స్థాయిలో విస్తరించడమే లక్ష్యంగా పెట్టుకున్నదని NPCI ఇంటర్నేషనల్ ఎండీ & సీఈఓ రితేశ్ శుక్లా తెలిపారు. ప్రయాణికులకు సురక్షితమైన, సులభమైన చెల్లింపు అనుభవం అందడమే కాకుండా రెండు దేశాల మధ్య డిజిటల్, ఆర్థిక సంబంధాలు బలపడతాయని చెప్పారు.
వివరాలు
'విజిట్ మలేసియా 2026' నేపథ్యంలో వాణిజ్యం, పర్యటన పెరుగుదలకు ఇది దోహదం
పేమెంట్స్ నెట్వర్క్ మలేసియా సీఈఓ ప్రవీణ్ రాజన్ మాట్లాడుతూ, ఈ ఒప్పందం సరిహద్దులు దాటి రోజువారీ చెల్లింపులను పెద్ద స్థాయిలో సాధ్యమయ్యేలా చేస్తుందన్నారు. 'విజిట్ మలేసియా 2026' నేపథ్యంలో వాణిజ్యం, పర్యటన పెరుగుదలకు ఇది దోహదం చేస్తుందని తెలిపారు. భారత్లోని National Payments Corporation of Indiaకు పూర్తిగా చెందిన NPCI ఇంటర్నేషనల్ ఇప్పటికే ఆసియా, మధ్యప్రాచ్యం, యూరప్ దేశాల్లో భాగస్వామ్యాలతో యూపీఐ స్వీకరణను విస్తరిస్తూ, రిమిటెన్సులు, క్యూ ఆర్ ఆధారిత పర్యాటక చెల్లింపులు, రియల్టైమ్ పేమెంట్ మౌలిక సదుపాయాలపై దృష్టి పెట్టిందని తెలిపింది.