Sridhar Vembu: ఇంటి నుంచి పని కంటే ఆఫీసే బెస్ట్.. జోహో సీఈఓ కామెంట్స్
ఈ వార్తాకథనం ఏంటి
ప్రధాన మంత్రి నరేంద్ర మోదీ ఇటీవల ఇంధన వినియోగం తగ్గించడం, ట్రాఫిక్ సమస్యలను తగ్గించే దిశగా కంపెనీలు వర్క్ ఫ్రం హోమ్ (WFH) విధానాన్ని పరిశీలించాలని సూచించిన సంగతి తెలిసిందే. ఈ నేపథ్యంలో శ్రీధర్ వెంబు స్పందించారు. తమ సంస్థలో వర్క్ ఫ్రం హోమ్ విస్తరణపై అంతర్గతంగా చర్చించినప్పటికీ, చివరికి దాన్ని మరింత పెంచకూడదని నిర్ణయించుకున్నట్లు వెల్లడించారు. ముఖ్యంగా రీసెర్చ్ అండ్ డెవలప్మెంట్ (R&D) టీమ్లలో ప్రత్యక్షంగా కలిసి పనిచేయడం వల్ల సమస్యలకు త్వరగా పరిష్కారాలు దొరుకుతాయని చెప్పారు. ఈ విషయాన్ని ఆయన సోషల్ మీడియా వేదిక Xలో వెల్లడించారు.
ట్విట్టర్ పోస్ట్ చేయండి
శ్రీధర్ వెంబు చేసిన ట్వీట్
Ultimately, after a lot of people inside weighed in on my X post, we decided not to expand WFH because the productivity of face to face problem solving is much higher in R&D. I have experienced this in my own development team - issues take longer to resolve when you are not…
— Sridhar Vembu (@svembu) May 18, 2026
వివరాలు
ఆఫీస్లో బ్రెయిన్స్టార్మింగ్, టీమ్ చర్చల ద్వారా మెరుగైన ఆలోచనలు
"చాలా మంది ఉద్యోగులు, సోషల్ మీడియా వినియోగదారుల అభిప్రాయాలను పరిశీలించిన తర్వాత WFHను విస్తరించకూడదని నిర్ణయించుకున్నాం. ముఖాముఖి చర్చలు, ప్రత్యక్ష సమస్య పరిష్కార విధానం R&Dలో ఎక్కువ ఫలితాలు ఇస్తుంది" అని పేర్కొన్నారు. తన అనుభవం ప్రకారం డెవలప్మెంట్ టీమ్లలో ఒకరినొకరు ప్రత్యక్షంగా కలుసుకుని చర్చించేటప్పుడు పనులు వేగంగా పూర్తవుతాయని వెంబు తెలిపారు. ఆఫీస్లో బ్రెయిన్స్టార్మింగ్, టీమ్ చర్చల ద్వారా మెరుగైన ఆలోచనలు వస్తాయని చెప్పారు. ప్రస్తుతం టెక్ రంగంలో రిమోట్ వర్క్, హైబ్రిడ్ మోడల్, ఆఫీస్-ఫస్ట్ విధానాలపై కొనసాగుతున్న చర్చకు ఆయన వ్యాఖ్యలు మరింత ప్రాధాన్యం తెచ్చాయి.
వివరాలు
హైబ్రిడ్ మోడల్ ఉత్తమ పరిష్కారం
అయితే WFH విస్తరణకు నో చెప్పినప్పటికీ, ఇంధన వినియోగాన్ని తగ్గించే ప్రత్యామ్నాయ మార్గాలను జోహో పరిశీలిస్తోందని తెలిపారు. ఉద్యోగుల రవాణా కోసం ఎలక్ట్రిక్ బస్సులు, ఆఫీస్ క్యాంటీన్లలో ఎలక్ట్రిక్ కుకింగ్ వ్యవస్థలను పరిశీలిస్తున్నట్లు చెప్పారు. ఇప్పటికే సౌరశక్తిపై భారీగా పెట్టుబడులు పెట్టినట్లు వెల్లడించారు. వెంబు పోస్టుపై సోషల్ మీడియాలో మిశ్రమ స్పందనలు వచ్చాయి. కొందరు ప్రత్యక్ష చర్చల వల్ల ఉత్పాదకత పెరుగుతుందని మద్దతు తెలపగా, మరికొందరు సరైన కమ్యూనికేషన్ టూల్స్, వీడియో కాల్స్, డాక్యుమెంటేషన్ ఉంటే రిమోట్ టీమ్లు కూడా సమర్థవంతంగా పనిచేయగలవని అభిప్రాయపడ్డారు. హైబ్రిడ్ మోడల్ ఉత్తమ పరిష్కారమని కొందరు సూచించారు.