Zomato: జొమాటోలో హోస్ట్‌ మోడ్‌.. అతిథులకు బిల్లు కనిపించదు
ఈ వార్తాకథనం ఏంటి
ఆన్‌లైన్‌ ఫుడ్‌ డెలివరీ సంస్థ జొమాటో దేశవ్యాప్తంగా కొత్త ఫీచర్‌ను అందుబాటులోకి తీసుకొచ్చింది. 'హోస్ట్‌ మోడ్‌' పేరుతో తీసుకొచ్చిన ఈ ఫీచర్‌ ద్వారా అతిథులు ఆహార పదార్థాల ధరలు చూడకుండానే తమకు నచ్చిన వంటకాలను ఆర్డర్‌ చేసుకోవచ్చు. స్నేహితులు, కుటుంబ సభ్యులకు విందు ఇచ్చే సమయంలో ఈ ఫీచర్‌ ఉపయోగపడుతుంది. ఎవరైనా తమకు భోజనం కొనిపెడుతున్నప్పుడు ధరలు చూసి అతిథులు ఆర్డర్‌ చేయడానికి ఇబ్బంది పడుతుంటారని ఆయుష్మాన్‌ అగర్వాలా అనే వ్యక్తి లింక్డ్‌ఇన్‌లో సూచించారు. తొలుత ఆయన ఈ ఫీచర్‌కు 'మెహమాన్‌ మోడ్‌' అని పేరు పెట్టారు.
వివరాలు
ఎలా పనిచేస్తుంది?
ఆయుష్మాన్‌ అగర్వాలా సూచనపై జొమాటో వ్యవస్థాపకుడు దీపిందర్‌ గోయల్‌ సానుకూలంగా స్పందించారు.
ఈ ఫీచర్‌ను అందుబాటులోకి తీసుకొస్తామని తెలిపారు. తాజాగా దీనిని 'హోస్ట్‌ మోడ్‌' పేరుతో ప్రారంభించారు.
ఈ ఫీచర్‌ ద్వారా అతిథులు రెస్టారెంట్ల మెనూలను చూడటంతో పాటు తమకు నచ్చిన వంటకాలను కార్ట్‌లో చేర్చుకోవచ్చు.
అయితే వాటి ధరలు మాత్రం కనిపించవు. దీంతో ఒక్కో వంటకం ధర ఎంత ఉంటుందోనని ఆలోచించకుండా తమకు నచ్చిన ఆహారాన్ని ఆర్డర్‌ చేసుకోవచ్చు.
వివరాలు
హోస్ట్‌ మోడ్‌ను ఎలా ఆన్‌ చేయాలి?
జొమాటో హోమ్ స్క్రీన్‌లోని 'హోస్ట్‌ మోడ్‌' ఆప్షన్‌ను ఎంచుకోవడం ద్వారా ఈ ఫీచర్‌ను ఉపయోగించుకోవచ్చు.
రెస్టారెంట్‌ మెనూ పేజీలోనూ ఈ ఆప్షన్‌ అందుబాటులో ఉంటుంది.
లేదంటే ప్రొఫైల్‌లోకి వెళ్లి 'యువర్‌ ప్రిఫరెన్సెస్‌'లోనూ దీన్ని ఎంచుకోవచ్చు.
'స్విచ్‌ ఆన్‌ హోస్ట్‌ మోడ్‌'పై క్లిక్‌ చేయగానే రెస్టారెంట్‌ మెనూలు, కార్ట్‌లోని ఆహార పదార్థాల ధరలు కనిపించవు.
'హోస్ట్‌ మోడ్‌లో అన్ని ధరలు దాచబడ్డాయి' అనే సందేశం కనిపిస్తుంది.
వివరాలు
బిల్లును హోస్ట్‌ మాత్రమే చూడగలరు
హోస్ట్‌ మోడ్‌లో బిల్లును చూసే అవకాశం హోస్ట్‌కు మాత్రమే ఉంటుంది.
ఆర్డర్‌ను పరిశీలించాలంటే 'ఎగ్జిట్‌ హోస్ట్‌ మోడ్‌ టు రివ్యూ బిల్‌' అనే ఆప్షన్‌ను ఎంచుకోవాలి.
అనంతరం వేలిముద్ర లేదా ఫేస్‌ లాక్‌ ద్వారా గుర్తింపును నిర్ధారించుకోవాలి. ఆ తర్వాత తగ్గింపులతో సహా పూర్తి బిల్లును చూసి 'ప్లేస్‌ ఆర్డర్‌'పై క్లిక్‌ చేయవచ్చు.
హోస్ట్‌ బిల్లును అతిథులకు చూపించాలని నిర్ణయించే వరకు అది వారికి కనిపించదు.