ఆదిపురుష్ ఆఫర్: 150రూపాయలకే 3డీ వెర్షన్ టిక్కెట్: ఏయే రాష్ట్రాల్లో ఆఫర్ వర్తిస్తుందంటే?
ఆదిపురుష్ చిత్రబృందం అరుదైన ఆఫర్ తో ప్రేక్షకుల ముందుకు వచ్చింది. 150రూపాయలకే 3డీ వెర్షన్ లో ఆదిపురుష్ సినిమాను చూసేందుకు అవకాశం కల్పిస్తోంది. అయితే ఈ ఆఫర్ కేవలం ఈ నెల 22, 23 తేదీల్లో మాత్రమే అందుబాటులో ఉండనుంది. అది కూడా తెలంగాణ, ఆంధ్రప్రదేశ్, కేరళ, తమిళనాడు రాష్ట్రాల్లో మాత్రమే ఈ ఆఫర్ ఉంటుంది. ఈ మేరకు ఆదిపురుష్ టీమ్ అధికారికంగా ప్రకటించింది. 23వ తేదీ తర్వాత మళ్ళీ యధావిధిగా 3డీ వెర్షన్ రేట్లు ఉండనున్నాయి. ఆదిపురుష్ చిత్రాన్ని త్రీడీ వెర్షన్ లో ఎక్కువ మంది చూసేందుకే ఇలాంటి నిర్ణయం తీసుకున్నట్లు చిత్రబృందం ప్రకటించింది.
హనుమంతుడి డైలాగుల్లో మార్పు
ఆదిపురుష్ చిత్రంపై వరుసగా వివాదాలు వస్తూనే ఉన్నాయి. సినిమాను ఆపివేయాలంటూ కొన్ని ప్రాంతాల్లో విమర్శలు చేస్తూనే ఉన్నారు. ఆదిపురుష్ సినిమాలోని పాత్రల వేషభాషలు, రామాయణాన్ని వక్రీకరించినట్టుగా ఉన్నాయని ఆరోపిస్తూ, ఆదిపురుష్ చిత్రాన్ని థియేటర్లలో ప్రదర్శించవద్దని కోరుతూ ప్రధాని మోదీకి ఆల్ ఇండియా సినీ వర్కర్స్ అసోసియేషన్ లేఖ రాసింది. తాజాగా ఆదిపురుష్ చిత్రంలోని హనుమంతుడి పాత్ర మాట్లాడిన వివాదాస్పద డైలాగులను మార్చివేసి, కొత్త డైలాగులను చేర్చారు. ప్రస్తుతం కొత్త డైలాగులతో సినిమాను ప్రదర్శిస్తున్నారు. అదలా ఉంచితే, ఆదిపురుష్ చిత్రానికి ఇప్పటివరకు 410కోట్ల వసూళ్ళు వచ్చాయని సమాచారం. ఈ సినిమాలో ప్రభాస్ రాముడిగా, క్రితిసనన్ సీతగా, సన్నీ సింగ్ లక్ష్మణుడిగా, దేవ్ దత్త నాగి హనుమంతుడిగా కనిపించారు.
