Kandula Durgesh: సినీ ఇండస్ట్రీకి ఏపీ సర్కార్ బంపర్ ఆఫర్.. స్టూడియోలు నిర్మిస్తే భూములు ఇస్తాం : మంత్రి
ఈ వార్తాకథనం ఏంటి
ఆంధ్రప్రదేశ్లో కొత్త సినీ పరిశ్రమ అభివృద్ధికి ప్రభుత్వం పూర్తి స్థాయిలో సహకారం అందించేందుకు సిద్ధంగా ఉందని రాష్ట్ర సినిమాటోగ్రఫీ మంత్రి కందుల దుర్గేష్ ప్రకటించారు. ఏపీలో సినిమా స్టూడియోలు, డబ్బింగ్ థియేటర్లు, అత్యాధునిక రీ-రికార్డింగ్ సదుపాయాలు ఏర్పాటు చేయాలనుకునే వారికి అవసరమైన భూములు కేటాయించేందుకు ప్రభుత్వం ముందుంటుందని ఆయన స్పష్టం చేశారు.
వివరాలు
శివాజీ విజ్ఞప్తికి మంత్రి సానుకూల స్పందన
ఏపీలో ప్రత్యేక సినీ పరిశ్రమ ఎప్పుడు రూపుదిద్దుకుంటుందనే ప్రశ్న చాలా కాలంగా వినిపిస్తున్నప్పటికీ, ఇప్పటివరకు స్పష్టమైన కార్యాచరణ కనిపించలేదు.
అప్పుడప్పుడు రాజకీయ నాయకులు ప్రకటనలు చేసినా, అది కార్యరూపం దాల్చలేదు. ఇలాంటి సమయంలో అక్కినేని అఖిల్ నటించిన 'లెనిన్' విజయోత్సవ సభలో నటుడు శివాజీ కీలక విజ్ఞప్తి చేశారు.
ఆంధ్రప్రదేశ్లో ప్రతిభావంతులైన కళాకారులకు కొదవ లేదని, యువతలో అపారమైన ప్రతిభ, ఉత్సాహం ఉందని పేర్కొన్న ఆయన.. రాష్ట్రంలో మరో సినీ పరిశ్రమ ఏర్పాటుకు ప్రభుత్వం చొరవ చూపాలని బహిరంగ వేదికపై మంత్రి కందుల దుర్గేష్ను కోరారు.
శివాజీ విజ్ఞప్తిపై వెంటనే స్పందించిన మంత్రి, ఏపీలో కొత్త సినీ పరిశ్రమ ఏర్పాటుకు ప్రభుత్వం ఎల్లప్పుడూ మద్దతుగా ఉంటుందని హామీ ఇచ్చారు.
వివరాలు
సినీ పరిశ్రమ అభివృద్ధే లక్ష్యం
'లెనిన్' సక్సెస్ మీట్లో మాట్లాడిన మంత్రి కందుల దుర్గేష్.. ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ నాయకత్వంలోని కూటమి ప్రభుత్వం తెలుగు చలనచిత్ర పరిశ్రమను మరింత ఉన్నత స్థాయికి తీసుకెళ్లడమే లక్ష్యంగా పనిచేస్తోందని తెలిపారు.
సినీ పరిశ్రమ అభివృద్ధికి ప్రభుత్వం అన్ని విధాలా అండగా ఉంటుందని స్పష్టం చేశారు.
వివరాలు
స్టూడియోల కోసం భూముల కేటాయింపు
ఆంధ్రప్రదేశ్లో సినిమా రంగాన్ని విస్తరించేందుకు చిత్ర పరిశ్రమ ప్రముఖులు ముందుకు రావాలని మంత్రి పిలుపునిచ్చారు.
రాష్ట్రంలో పెట్టుబడులు పెట్టే నిర్మాతలు, దర్శకులకు సింగిల్ విండో విధానం ద్వారా అన్ని అనుమతులను వేగంగా, సులభంగా మంజూరు చేస్తామని హామీ ఇచ్చారు.
అలాగే ఎవరైనా ఆధునిక సినిమా స్టూడియోలు, డబ్బింగ్ థియేటర్లు, అత్యాధునిక రీ-రికార్డింగ్ థియేటర్లు నిర్మించాలనుకుంటే, ప్రభుత్వం తరఫున అవసరమైన భూములను కేటాయించేందుకు సిద్ధంగా ఉన్నామని వెల్లడించారు.
వివరాలు
షూటింగ్ల కోసం ప్రత్యేక జీవో
సినిమా షూటింగ్లు, నిర్మాణాలకు అనుకూలమైన వాతావరణం కల్పించేందుకు నిర్మాత నాగవంశీ సూచించినట్లుగా త్వరలోనే ప్రత్యేక జీవో (GO) తీసుకురావడానికి ప్రయత్నాలు జరుగుతున్నాయని మంత్రి వెల్లడించారు.
భవిష్యత్తులో విజయవాడ-గుంటూరు ప్రాంతంతో పాటు విశాఖపట్నం, తిరుపతి ప్రాంతాల్లో అన్ని మౌలిక సదుపాయాలతో కూడిన బలమైన సినీ పరిశ్రమను అభివృద్ధి చేయాలని ప్రభుత్వం లక్ష్యంగా పెట్టుకున్నట్లు మంత్రి తెలిపారు.
ఈ అభివృద్ధిలో భాగస్వాములు కావాలని పెట్టుబడిదారులకు ఆయన పిలుపునిచ్చారు.
వివరాలు
'లెనిన్' చిత్రబృందానికి అభినందనలు
ఈ సందర్భంగా 'లెనిన్' చిత్రబృందాన్ని మంత్రి ప్రత్యేకంగా అభినందించారు.
చిత్తూరు గ్రామీణ నేపథ్యాన్ని, మహాభారత ఘట్టాలను సమన్వయం చేస్తూ రస్టిక్ విజువల్ వండర్గా చిత్రాన్ని రూపొందించిన దర్శకుడి ప్రతిభను కొనియాడారు.
అలాగే హీరో అక్కినేని అఖిల్ భవిష్యత్తులో మరిన్ని భారీ విజయాలు సాధించి, బాక్సాఫీస్ వద్ద రికార్డు స్థాయి వసూళ్లు సాధించే అగ్ర హీరోగా ఎదగాలని ఆకాంక్షించారు.
చిత్ర నిర్మాణంలో భాగస్వాములైన కింగ్ నాగార్జునతో పాటు నిర్మాతలకు కూడా ఈ సందర్భంగా ప్రత్యేక అభినందనలు, ధన్యవాదాలు తెలిపారు.