బలగం: చిన్న సినిమాకు పెద్ద గౌరవం, రెండు అంతర్జాతీయ అవార్డులు కైవసం
ఈ వార్తాకథనం ఏంటి
చిన్న సినిమాగా వచ్చిన బలగం చిత్రం, బాక్సాఫీసు వద్ద ప్రభంజనం సృష్టించింది. వేణు యెల్దండి(జబర్దస్త్ వేణు) దర్శకత్వం వహించిన ఈ సినిమాకు జనం బ్రహ్మరథం పట్టారు.
తెలంగాణ గ్రామీణ సంస్కృతిని వెండితెర మీద హృద్యంగా, మనసుకు హత్తుకునేలా చూపించిన బలగం చిత్రానికి ప్రశంసలు దక్కుతూనే ఉన్నాయి.
అమెజాన్ ప్రైమ్ వీడియోలో డిజిటల్ లో అందుబాటులో ఉన్నా కూడా థియేటర్లలో బలగం సినిమాను చూడడానికి జనాలు తరలివెళ్తున్నారు.
అంతటి గుర్తింపును అందుకున్న బలగం చిత్రానికి అంతర్జాతీయ స్థాయిలో రెండు అవార్డులు వచ్చాయి. అవును, అమెరికాలోని లాస్ ఏంజిల్స్ సినిమాటోగ్రఫీ అవార్డ్స్ (LACA) వారు అవార్డులు అందజేసారు.
ఉత్తమ చిత్రం విభాగంలో, ఉత్తమ కెమెరా విభాగంలో అవార్డులు సొంతం చేసుకుంది బలగం.
బలగం
సోషల్ మీడియాలో అభినందనల వెల్లువ
ఉత్తమ చిత్రం విభాగంలో చిత్ర దర్శకుడు వేణు యెల్దండి అవార్డు అందుకోగా, ఉత్తమ కెమెరా విభాగంలో ఆచార్య వేణు అవార్డు తీసుకున్నాడు.
ఈ మేరకు ఈ విషయాన్ని చిత్ర నిర్మాణ సంస్థ దిల్ రాజు ప్రొడక్షన్స్, ట్విట్టర్ వేదికగా తెలియజేసింది. దింతో చిత్ర పరిశ్రమ నుండి బలగం టీమ్ ను అభినందిస్తూ సోషల్ మీడియాలో కామెంట్లు పెడుతున్నారు.
తెలంగాణలోని సిరిసిల్ల ప్రాంత గ్రామాల్లో బలగం చిత్రాన్ని తెరకెక్కించారు. మరణం చుట్టూ నడిచే కథలో, అనేక భావోద్వేగాలు అందరి కళ్లలోంచి కన్నీళ్ళను తెప్పిస్తాయి.
ప్రియదర్శి, కావ్యా కళ్యాణ్ రామ్ హీరో హీరోయిన్లుగా నటించిన ఈ చిత్రాన్ని హర్షిత్ రెడ్డి, హన్షిత రెడ్డి నిర్మించారు. భీమ్స్ సిసిరోలియో సంగీతం అందించారు.