Bala Krishna : 'అఖండ 2'తో బాలయ్య మరోసారి రికార్డు.. యూఎస్ మార్కెట్లో అరుదైన ఘనత
ఈ వార్తాకథనం ఏంటి
నందమూరి నటసింహం బాలకృష్ణ హీరోగా, సంయుక్త మీనన్ హీరోయిన్గా దర్శకుడు బోయపాటి శ్రీను తెరకెక్కించిన భారీ అంచనాల సీక్వెల్ 'అఖండ 2' బాక్సాఫీస్ వద్ద దూకుడు చూపిస్తోంది. కొన్నేళ్ల క్రితం సంచలన విజయాన్ని సాధించిన 'అఖండ'కు కొనసాగింపుగా 'అఖండ 2: తాండవం' పేరుతో విడుదలైన ఈ చిత్రం, మిశ్రమ స్పందనలు వచ్చినప్పటికీ బాలయ్య రికార్డుల పరంపరను కొనసాగిస్తోంది. ముఖ్యంగా నార్త్ అమెరికా మార్కెట్లో బాలకృష్ణకు ఉన్న క్రేజ్ మరోసారి స్పష్టంగా కనిపిస్తోంది. 'అఖండ 2'తో కలిపి బాలయ్య వరుసగా ఐదు సినిమాలు యూఎస్లో 1 మిలియన్ డాలర్ల గ్రాస్ వసూళ్ల మార్క్ను దాటడం విశేషంగా మారింది. ఈ జాబితాలో అఖండ, వీరసింహారెడ్డి, భగవంత్ కేసరి, డాకు మహారాజ్, అఖండ 2 చిత్రాలు ఉన్నాయి.
Details
యూఎస్ మార్కెట్లో 1 మిలియన్ డాలర్ల వసూళ్లు
సీనియర్ హీరోగా ఈ స్థాయిలో వరుసగా ఐదు సినిమాలు యూఎస్ మార్కెట్లో 1 మిలియన్ డాలర్ల వసూళ్లు సాధించడం అరుదైన రికార్డుగా నిలుస్తోంది. ఇదే కాకుండా నార్త్ అమెరికాలో మొత్తం ఆరు 1 మిలియన్ డాలర్ల సినిమాలు కలిగిన ఏకైక సీనియర్ హీరోగా కూడా బాలకృష్ణ మరో రికార్డు సృష్టించారు. ఈ జాబితాలో 'గౌతమీపుత్ర శాతకర్ణి' సినిమా కూడా ఉండటం గమనార్హం. దీంతో టాలీవుడ్ సీనియర్ హీరోలలో యూఎస్ మార్కెట్ విషయంలో బాలకృష్ణదే స్పష్టమైన ఆధిపత్యమని సినీ వర్గాలు విశ్లేషిస్తున్నాయి. క్రిటిక్స్ టాక్ ఎలా ఉన్నా, అభిమానుల మద్దతు, బాక్సాఫీస్ స్థిరత్వంతో బాలయ్య తన మార్కెట్ పవర్ను మరోసారి నిరూపించారు.
Details
ప్రస్తుతం గోపిచంద్ మలినేని దర్శకత్వంలో 'ఎన్బీకే 111'
'అఖండ 2' విజయం నందమూరి అభిమానులకు మాత్రమే కాకుండా, సీనియర్ హీరోలకూ స్ఫూర్తినిచ్చే రికార్డుగా నిలుస్తోంది. ఇక బాలకృష్ణ ప్రస్తుతం గోపిచంద్ మలినేని దర్శకత్వంలో ఎన్బీకే 111 చిత్రంలో నటిస్తున్నారు. ఈ సినిమా షూటింగ్ శరవేగంగా కొనసాగుతుండగా, వచ్చే ఏడాది ప్రేక్షకుల ముందుకు తీసుకురానున్నారు. ఈ చిత్రం కూడా బాలయ్యకు మరో బంపర్ హిట్ను అందిస్తుందన్న నమ్మకం అభిమానుల్లో బలంగా ఉంది.