Hyderabad: షాప్ ప్రారంభోత్సవానికి పిలిచి.. బాలీవుడ్ నటిపై దాడి!
ఈ వార్తాకథనం ఏంటి
హైదరాబాద్ నగరంలో బాలీవుడ్ నటిపై జరిగిన దాడి ఘటన ఆలస్యంగా వెలుగులోకి వచ్చింది.
ముంబయిలో నివసించే 30 ఏళ్ల బాలీవుడ్/టీవీ నటి ఈ నెల 17న హైదరాబాద్‌కు చెందిన ఓ స్నేహితురాలి నుంచి ఫోన్ కాల్ అందుకున్నారు.
షాప్ ప్రారంభోత్సవానికి అతిథిగా హాజరుకావాలని ఆమె కోరింది. ఈ కార్యక్రమంలో పాల్గొంటే విమాన ఛార్జీలు, పారితోషికం అందిస్తామని చెప్పింది.
ఆ నటి ఈ నెల 18న హైదరాబాద్‌కు వచ్చి మాసబ్‌ట్యాంక్ శ్యామ్‌నగర్ కాలనీలోని ఓ అపార్ట్‌మెంట్‌లో బస చేశారు.
అక్కడ ఓ వృద్ధ మహిళ ఆమెకు అవసరమైన వసతులు ఏర్పాటు చేశారు.
Details
వ్యభిచారం చేయాలని ఒత్తిడి
21న రాత్రి 9 గంటలకు ఇద్దరు మహిళలు ఆమె గదిలోకి వచ్చి వ్యభిచారం చేయాలని ఒత్తిడి తెచ్చారు.
అదే రోజు రాత్రి 11 గంటలకు ముగ్గురు పురుషులు గదిలోకి ప్రవేశించి, తమతో గడపాలని ఒత్తిడి చేశారు.
దీనికి నిరాకరించిన ఆమెపై దాడికి పాల్పడ్డారు. నటి గట్టిగా అరిచి, పోలీసులకు ఫిర్యాదు చేస్తానని హెచ్చరించగానే ముగ్గురు పురుషులు అక్కడి నుంచి పారిపోయారు.
అయితే వృద్ధ మహిళ, ఇద్దరు మహిళలు నటిని గదిలో బంధించి, రూ. 50 వేల నగదుతో పరారయ్యారు.
బాధితురాలు వెంటనే డయల్ 100కు కాల్ చేయగా, పోలీసులు ఘటనాస్థలికి చేరుకున్నారు. ఆమె ఫిర్యాదు మేరకు మాసబ్‌ట్యాంక్ పోలీసులు శనివారం కేసు నమోదు చేసి దర్యాప్తు చేపట్టారు.