The Paradise Release Date: నాని 'ది ప్యారడైజ్' రిలీజ్ డేట్పై క్లారిటీ.. ఆ తేదీన పక్కా!
ఈ వార్తాకథనం ఏంటి
నేచురల్ స్టార్ నాని కథానాయకుడిగా శ్రీకాంత్ ఓదెల దర్శకత్వంలో తెరకెక్కుతున్న యాక్షన్ థ్రిల్లర్ 'ది ప్యారడైజ్'. దాదాపు షూటింగ్ పూర్తి చేసుకున్న ఈ చిత్రాన్ని సెప్టెంబరు 24న ప్రేక్షకుల ముందుకు తీసుకురానున్నట్లు చిత్రబృందం ఇప్పటికే ప్రకటించింది. అయితే, గత రెండు మూడు రోజులుగా ఈ సినిమా మరోసారి వాయిదా పడనుందంటూ సోషల్ మీడియాలో పలు పోస్టులు వైరల్గా మారాయి. 'ది ప్యారడైజ్' పోస్ట్ ప్రొడక్షన్ పనులు ఇంకా పూర్తికాలేదని, సినిమాలోని ఓ పాటను కూడా చిత్రీకరించాల్సి ఉందంటూ ఆ పోస్టుల్లో ప్రచారం జరిగింది. దీంతో సినిమా విడుదల తేదీపై సందేహాలు వ్యక్తమయ్యాయి. ఈ నేపథ్యంలో చిత్రబృందం ఆ వార్తలకు చెక్ పెట్టింది.
వివరాలు
సెప్టెంబర్ 24న రిలీజ్
'ది ప్యారడైజ్' విడుదల తేదీలో ఎలాంటి మార్పు లేదని మరోసారి స్పష్టం చేసింది.
సెప్టెంబరు 24నే సినిమాను విడుదల చేయనున్నట్లు తెలియజేస్తూ.. అదే తేదీతో కూడిన కొత్త పోస్టర్ను మేకర్స్ తాజాగా విడుదల చేశారు.
అంతేకాదు, సెప్టెంబరు 23 రాత్రి ప్రత్యేక ప్రీమియర్ షోలను కూడా ప్రదర్శించేందుకు చిత్రబృందం సన్నాహాలు చేస్తున్నట్లు సమాచారం. తెలుగుతో పాటు ఇతర భాషల్లోనూ 'ది ప్యారడైజ్'ను విడుదల చేయనున్నారు.
విజయవంతమైన 'దసరా' తర్వాత నాని, శ్రీకాంత్ ఓదెల కాంబినేషన్లో వస్తున్న చిత్రం 'ది ప్యారడైజ్'. ఈ సినిమాలో నాని 'జడల్' అనే పాత్రలో కనిపించనున్నారు. గతంలో వీరిద్దరి కలయికలో వచ్చిన 'దసరా'కు ప్రేక్షకుల నుంచి మంచి స్పందన లభించింది.
వివరాలు
'దసరా' తర్వాత మరోసారి అదే కాంబినేషన్
దీంతో మరోసారి ఈ కాంబినేషన్లో వస్తున్న 'ది ప్యారడైజ్'పై మొదటి నుంచే భారీ ఆసక్తి నెలకొంది. నానితో పాటు ఈ చిత్రంలో మోహన్బాబు, తనికెళ్ల భరణి, సోనాలి కులకర్ణి, సంపూర్ణేష్ బాబు, ఈశ్వరీ రావు తదితరులు కీలక పాత్రల్లో నటిస్తున్నారు.
కయాదు లోహర్ కథానాయికగా కనిపించనున్నారు. ఇప్పటికే భారీ అంచనాలు ఏర్పడిన 'ది ప్యారడైజ్'కు సంబంధించి విడుదల తేదీపై వచ్చిన పుకార్లకు చిత్రబృందం తాజా ప్రకటనతో స్పష్టత వచ్చింది.
సెప్టెంబరు 24న థియేటర్లలోకి రానున్న ఈ సినిమాకు ఒక రోజు ముందుగానే ప్రత్యేక ప్రీమియర్లు కూడా ప్రదర్శించే అవకాశం ఉండటంతో నాని అభిమానుల్లో మరింత ఆసక్తి పెరిగింది.