లక్కీ భాస్కర్ :సీతారామం తర్వాత దుల్కర్ సల్మాన్ డైరెక్ట్ తెలుగు సినిమా వచ్చేస్తోంది
మలయాళీ హీరో దుల్కర్ సల్మాన్ తెలుగు వారికి పరిచయమే. ఓకే బంగారం, మహానటి వంటి సినిమాలతో తెలుగు ప్రేక్షకులకు దుల్కర్ సల్మాన్ దగ్గరయ్యాడు. ఈ మధ్య రిలీజైన సీతారామం సినిమాతో సోలో హీరోగా తెలుగులో మంచి హిట్ అందుకున్నాడు. సీతారామం తర్వాత దుల్కర్ తెలుగులో నటిస్తున్న సినిమాపై ఈరోజు అప్డేట్ వచ్చింది. దుల్కర్ సల్మాన్ పుట్టినరోజు సందర్భంగా సినిమా టైటిల్ ని ప్రకటించారు. లక్కీ భాస్కర్ అనే టైటిల్ తో రూపొందుతున్న ఈ సినిమాను సార్ సినిమా దర్శకుడు వెంకీ అట్లూరి తెరకెక్కిస్తున్నారు. టైటిల్ పోస్టర్ చాలా ఇంట్రెస్టింగ్ గా ఉంది. దుల్కర్ సల్మాన్ ముఖాన్ని కరెన్సీ నోటు సగభాగం కప్పేస్తున్నట్టు పోస్టర్ ని డిజైన్ చేసారు.
డబ్బు చుట్టూ తిరిగే కథ
టైటిల్ అక్షరాల్లోనూ చివరి ఇంగ్లీష్ అక్షరంలో R కు బదులుగా రూపాయి సింబల్ ని ఉంచారు. దీన్ని బట్టి లక్కీ భాస్కర్ అనే సినిమా కథ, డబ్బు చుట్టూ తిరుగుతుందని తెలుస్తోంది. మరి ఈ విషయమై మరింత సమాచారం తెలియాలంటే లక్కీ భాస్కర్ నుండి గ్లింప్స్ కానీ, టీజర్ కానీ రిలీజ్ కావాల్సిందే. ప్రస్తుతానికి ఈ సినిమాలో హీరోయిన్ గా ఎవరు నటిస్తున్నారో వెల్లడి చేయలేదు. సంగీతాన్ని మాత్రం జీవీ ప్రకాష్ అందిస్తున్నారని తెలియజేసారు. సితార ఎంటర్ టైన్మెంట్స్, ఫార్ఛూన్ ఫోర్ సినిమాస్, శ్రీకర స్టూడియోస్ సంయుక్తంగా నిర్మిస్తున్న ఈ సినిమాను సూర్యదేవర నాగవంశీ, సాయి సౌజన్య నిర్మిస్తున్నారు.
