Prasanna Kumar: టాలీవుడ్ యూనియన్ వార్కు ఎండ్ కార్డ్.. బాలయ్య ఎంట్రీతో సెట్ అయిన వివాదం!
ఈ వార్తాకథనం ఏంటి
టాలీవుడ్లో ఇటీవల డాన్సర్స్ యూనియన్, ఫైటర్స్ యూనియన్, ఫెడరేషన్ మధ్య నెలకొన్న వివాదానికి ఎట్టకేలకు తెరపడింది. పరిశ్రమ పెద్దలు, సంఘాల ప్రతినిధుల చర్చల అనంతరం సమస్య సామరస్యంగా పరిష్కారమైందని నిర్మాతల మండలి కార్యదర్శి ప్రసన్నకుమార్ వెల్లడించారు. ఈ సందర్భంగా ఆయన మాట్లాడుతూ.. ఒక కుటుంబంలో చిన్న చిన్న అపార్థాలు ఎలా వస్తాయో.. ఇదీ అలాంటి సమస్యే. ఇప్పుడు అన్ని విభేదాలు తొలగిపోయాయి. డాన్సర్స్ అసోసియేషన్ సభ్యులంతా ఇకపై ఐక్యంగా ముందుకు సాగుతారని చెప్పారు.
వివరాలు
బాలకృష్ణ చొరవతో పరిష్కారం
ఈ సమస్య పరిష్కారంలో నటుడు, ఎమ్మెల్యే నందమూరి బాలకృష్ణ కీలక పాత్ర పోషించినట్లు ప్రసన్నకుమార్ తెలిపారు.
కాకినాడలో ఉన్నప్పటికీ బాలకృష్ణ స్వయంగా ఫోన్ చేసి.. సినిమా పరిశ్రమలో ఇలాంటి విభేదాలు ఉండకూడదని, సమస్యను త్వరగా పరిష్కరించాలని సూచించినట్లు వెల్లడించారు.
ఆయన ఇచ్చిన సూచనల మేరకు పరిశ్రమ పెద్దలు, వివిధ సంఘాల ప్రతినిధులు సమావేశమై చర్చించి సమస్యకు పరిష్కారం కనుగొన్నారని చెప్పారు.
డాన్సర్స్ సంఘంలోని ఇరువర్గాల సభ్యులూ ఎంతో కష్టపడి పనిచేసే వారేనని, వారందరూ మంచి వ్యక్తులేనని పేర్కొంటూ.. ఈ అంశానికి ఇక పూర్తిగా ముగింపు పలికినట్లు స్పష్టం చేశారు.
వివరాలు
'షేరింగ్ రేషియో' విధానంపై కీలక నిర్ణయం
ప్రస్తుతం డాన్సర్స్, ఫైటర్స్ యూనియన్లలో అమలవుతున్న 'షేరింగ్ రేషియో' విధానంపై చాలా కాలంగా అభ్యంతరాలు వ్యక్తమవుతున్నాయని ప్రసన్నకుమార్ తెలిపారు.
హైదరాబాద్లో జరిగే షూటింగ్ల కోసం నిర్మాతలు తమ అవసరానికి అనుగుణంగా స్థానిక డాన్సర్లు, ఫైటర్లను ఎంపిక చేసుకునే స్వేచ్ఛ ఉండాలని అభిప్రాయపడ్డారు.
ప్రస్తుతం ఇద్దరు కోఆర్డినేటర్ల వ్యవస్థ నిర్మాతలకు అదనపు భారం అవుతోందని, అందువల్ల ఇకపై 'ఒకే కోఆర్డినేటర్ వ్యవస్థ' అమలు చేసే దిశగా చర్యలు తీసుకోవాలని సమావేశంలో నిర్ణయించినట్లు వెల్లడించారు.
వివరాలు
నిధుల దుర్వినియోగంపై కఠిన చర్యలు
కార్మికుల సంక్షేమం పేరుతో నిధులను దుర్వినియోగం చేసే వారిపై కఠిన చర్యలు తీసుకోవాలని సమావేశంలో ఏకాభిప్రాయం వ్యక్తమైనట్లు చెప్పారు.
నిజంగా శ్రమించే కార్మికులకు వారి హక్కులు, సంక్షేమ ప్రయోజనాలు పూర్తిగా అందేలా వ్యవస్థను బలోపేతం చేయడమే తమ లక్ష్యమని స్పష్టం చేశారు.
అలాగే నిర్మాత కూడా పరిశ్రమలో తొలి కార్మికుడేనని పేర్కొంటూ.. నిర్మాతల ప్రయోజనాలను కాపాడుతూనే కార్మికులకు పూర్తి న్యాయం జరిగే విధంగా వ్యవస్థ ఉండాలని అభిప్రాయపడ్డారు
వివరాలు
జానీ మాస్టర్ అంశంపైనా స్పష్టత
ఫెడరేషన్కు, కొరియోగ్రాఫర్ జానీ మాస్టర్కు సంబంధించిన వివాదంపై కూడా ప్రసన్నకుమార్ స్పందించారు.
ఈ అంశంలో చట్టపరంగా ఎలాంటి అడ్డంకులు లేవని, ఎవరి ప్రతిభను లేదా నైపుణ్యాన్ని అడ్డుకునే హక్కు ఎవరికీ లేదని స్పష్టం చేశారు.
చివరిగా.. ఈ వివాదంలో ఎవరూ గెలవలేదని, ఎవరూ ఓడిపోలేదని పేర్కొంటూ.. ఇది ఒక కుటుంబంలో జరిగే చిన్న అపార్థంలాంటిదేనని వ్యాఖ్యానించారు.
ఇకపై పరిశ్రమలో శాంతియుత వాతావరణం కొనసాగేందుకు అన్ని సంఘాలు కలిసికట్టుగా పనిచేయాలని, కార్మికుల సంక్షేమం, నిర్మాతల ప్రయోజనాలు, పరిశ్రమ అభివృద్ధి కోసం అందరూ ఏకమై ముందుకు సాగాలని ఆయన పిలుపునిచ్చారు.