హరిహర వీరమల్లు సినిమాకు అనుకోని దెబ్బ: షూటింగ్ సెట్లో అగ్ని ప్రమాదం
పవర్ స్టార్ పవన్ కళ్యాణ్ హీరోగా క్రిష్ దర్శకత్వంలో హరిహర వీరమల్లు సినిమా తెరకెక్కుతోన్న సంగతి తెలిసిందే. చారిత్రక అంశాలను తీసుకుని కథగా రాసుకుని వెండితెర మీదకు తీసుకువస్తున్నారు క్రిష్. అయితే తాజాగా ఈ సినిమా షూటింగ్ సెట్లో అగ్నిప్రమాదం జరిగింది. హైదరాబాద్ లోని దుండిగల్ ప్రాంత పరిధిలో బౌరంపేటలో ఉన్న హరిహర వీరమల్లు షూటింగ్ సెట్లో ఫైర్ ఆక్సిడెంట్ జరిగింది. గతంలో వర్షాలకు సెట్ కూలిపోవడంతో దానికి రిపేర్లు చేయడానికి సిద్ధమయ్యారు. ఈ క్రమంలోనే ఫైర్ ఆక్సిడెంట్ జరిగినట్లు తెలుస్తోంది. ప్రస్తుత వివరాల ప్రకారం సెట్ చాలా డ్యామేజ్ అయిపోయినట్లు, భారీగా ఆస్తి నష్టం జరిగినట్లు సమాచారం.
బందిపోటు దొంగగా పవన్ కళ్యాణ్
హరిహర వీరమల్లు సినిమాలో పవన్ కళ్యాణ్ బందిపోటు దొంగగా కనిపిస్తున్నారు. మొఘల్ చక్రవర్తి ఔరంగజేబు కాలం నాటి కథను వెండితెర మీద చూపించబోతున్నాడు దర్శకుడు క్రిష్. ఈ సినిమా నుండి ఇప్పటివరకు రిలీజ్ అయిన గ్లింప్స్ వీడియోకు ప్రేక్షకుల నుండి మంచి స్పందన వచ్చింది. నిధి అగర్వాల్ హీరోయిన్ గా నటిస్తున్న ఈ సినిమాకు ఆస్కార్ అందుకున్న మ్యూజిక్ డైరెక్టర్ ఎంఎం కీరవాణి సంగీతాన్ని సమకూరుస్తున్నారు. పవన్ కళ్యాణ్ కెరీర్ లో మొట్టమొదటి పాన్ ఇండియా చిత్రం ఇదే. అదలా ఉంచితే, పవన్ కళ్యాణ్ ప్రస్తుతం బ్రో, ఉస్తాద్ భగత్ సింగ్, ఓజీ సినిమాల షూటింగుల్లో పాల్గొంటున్నారు. వీటిలో బ్రో సినిమా 2023 జూలై 28వ తేదీన ప్రేక్షకుల ముందుకు వస్తోంది.
