ఎర్రచందనం స్మగ్లింగ్ కేసులో జబర్దస్త్ కమెడియన్: తనకేమీ సంబంధం లేదంటున్న హరికృష్ణ
ప్రముఖ జబర్దస్త్ కమెడియన్ హరిబాబు, ఎర్రచందనం స్మగ్లింగ్ కేసులో సోమవారం అరెస్టు అయ్యారని వార్తలు వచ్చాయి. జబర్దస్త్ లో లేడీ గెటప్పులు వేసే హరి ఫోటోను చూపిస్తూ వార్తలు వచ్చాయి. అయితే స్మగ్లింగ్ కేసు నమోదయ్యింది ఫోటోలో కనిపించిన హరి మీద కాదని, వైఎస్ హరిబాబు మీద అని సమాచారం. గతంలో షకలక శంకర్ టీమ్ లో పనిచేసిన వైఎస్ హరిబాబు మీద ఎర్రచందనం స్మగ్లింగ్ విషయంలో పోలీసు కేసు నమోదయ్యింది. హరిబాబు అనే పేరు ఉండడంతో, జబర్దస్త్ లో లేడీ గెటప్పులో కనిపించే గంపా హరికృష్ణ ఫోటలు వార్తల్లో వచ్చాయి. ఈ విషయమై తాజాగా గంపా హరికృష్ణ స్పందించాడు.
గూగుల్ చేస్తున్న మాయ
స్మగ్లింగ్ కేసు నమోదయ్యింది తన మీద కాదనీ, పేర్లు ఒకేలా ఉండడంతో అందరూ తననే అనుకుంటున్నారనీ, గూగుల్ లో సెర్చ్ చేస్తే తన ఫోటోలు రావడంతో జనాలు అందరూ కన్ఫ్యూజ్ అయ్యారని గంపా హరికృష్ణ తెలియజేసారు. ఇకపోతే వైఎస్ హరిబాబు మీద ఎర్రచందనం స్మగ్లింగ్ కేసు నమోదు కావడం ఇది మొదటిసారి మాత్రమే కాదు. గతంలో నాలుగేళ్ల కిందటే అతని మీద స్మగ్లింగ్ కేసు నమోదయ్యింది. అప్పటి నుండి చాలా రోజులు పరారీలో ఉన్నాడు హరిబాబు. ఆ తర్వాత మళ్ళీ ఇన్నాళ్ళకి హరిబాబు మీద స్మగ్లింగ్ కేసు నమోదయ్యింది.
