ఎన్టీఆర్ అభిమానులకు గుడ్ న్యూస్: అదుర్స్ మళ్లీ వచ్చేస్తుంది?
ఈ వార్తాకథనం ఏంటి
టాలీవుడ్ లో రీ రిలీజ్ ల ట్రెండ్ జోరుగా నడుస్తోంది. అభిమానుల కోరిక మేరకు పాత సినిమాలను మళ్ళీ మళ్ళీ థియేటర్లలో వేస్తున్నారు. రీ రిలీజ్ లకు ప్రేక్షకుల నుండి మంచి స్పందన కుడా వస్తోంది. ఇప్పటికే చాలా సినిమాలు రీ రిలీజ్ కి రెడీ అవుతున్నాయి. అందులో జూనియర్ ఎన్టీఆర్ నటించిన బ్లాక్ బస్టర్ మూవీ, అదుర్స్ కూడా చేరే అవకాశం ఉన్నట్లు కనిపిస్తోంది. వివి వినాయక్ దర్శకత్వం వహించిన అదుర్స్ మూవీ, అప్పట్లో బ్లాక్ బస్టర్ గా నిలిచింది. ఎన్టీఆర్ ద్విపాత్రాబినయంలో ప్రేక్షకులను మెప్పించాడు. బ్రహ్మానందం, ఎన్టీఆర్ మధ్య వచ్చే సీన్లు థియేటర్లలో నవ్వుల బాంబులుగా పేలాయి. చారి పాత్రలో ఎన్టీఆర్ నటించిన తీరును ఎవ్వరూ ఎప్పటికీ మర్చిపోలేరు.
ఎన్టీఆర్
అదుర్స్ రీ రిలీజ్ ఎప్పుడు ఉంటుందంటే?
ఎన్టీఆర్ చేసిన అత్యద్భుతమైన పాత్రల జాబితా చూసుకుంటే అందులో అదుర్స్ సినిమాలోని చారి పాత్రకు ప్రత్యేక స్థానం ఉంటుంది. మరి ఇపుడు ఆ సినిమా మళ్ళీ రీ రిలీజ్ అవుతుంటే అభిమానులు ఖచ్చితంగా సంతోషిస్తారు. ఐతే రీ రిలీజ్ ఉంటుందన్న మాట బయటకు వచ్చిందే గానీ అదెప్పుడు ఉంటుందో మాత్రం బయటకు రాలేదు. ఈ విషయమై మరికొద్ది రోజుల్లో అధికారిక ప్రకటన వెలువడుతుందని తెలుస్తోంది. ఆర్ఆర్ఆర్ సినిమా సూపర్ సక్సెస్ అయ్యాక కొరటాల శివతో ఎన్టీఆర్30 మూవీ మొదలెట్టాడు ఎన్టీఆర్. ఈ సినిమా షూటింగ్ మార్చ్ లో మొదలవుతుందని స్వయంగా ఎన్టీఆరే చెప్పారు. ఎన్టీఆర్ 30 సినిమాలో హీరోయిన్ ఎవరనేది ఇంకా ప్రకటించలేదు.