అటు ఒక సినిమా రిలీజ్ పెట్టుకుని ఇటు సినిమా లాంఛ్ చేసిన కిరణ్ అబ్బవరం
ఈ వార్తాకథనం ఏంటి
యంగ్ హీరో కిరణ్ అబ్బవరం, ప్రేక్షకుల మీద దండయాత్ర చేయడానికి సిద్ధమైనట్లుగా కనిపిస్తోంది. ఇటీవల వినరో భాగ్యము విష్ణుకథ సినిమాతో యావరేజ్ విజయం అందుకున్న ఈ యంగ్ హీరో, ఇప్పుడు మీటర్ అంటూ మాస్ సినిమాతో ప్రేక్షకుల ముందుకు వస్తున్నాడు. ఏప్రిల్ 7వ తేదీన మీటర్ మూవీ రిలీజ్ కాబోతుంది. అదలా ఉంటే, ఇప్పుడు మరొక కొత్త సినిమాను ప్రారంభించాడు కిరణ్ అబ్బవరం. శివమ్ సెల్యులాయిడ్ బ్యానర్ లో రొమాంటిక్ డ్రామాగా రూపొందే సినిమాలో కిరణ్ నటిస్తున్నాడు. ఈ సినిమా పూజా కార్యక్రమాలు, రామా నాయుడు స్టూడియోలో పూర్తయ్యాయి. దర్శకుడు వివి వినాయక్, సౌండ్ క్లాప్ ఇవ్వగా, నిర్మాతలు దగ్గుబాటి సురేష్ బాబు, ఏఎమ్ రత్నం కెమెరా ఆన్ చేసారు.
కిరణ్ అబ్బవరం
ఆభిమానులు ఆపమంటుంటే కిరణ్ ఆపనంటున్నాడు
కొత్త దర్శకుడు విశ్వ కరుణ్ ఈ సినిమాతో డైరెక్టర్ గా పరిచయం అవుతున్నాడు. ఇందులో కిరణ్ అబ్బవరం జోడీగా ఎవరు నటిస్తున్నారనేది ఇంకా ప్రకటించలేదు. ఈ నెల చివర్లో ఈ సినిమా షూటింగ్ మొదలవుతుందని అంటున్నారు. కిరణ్ అబ్బవరం వరుస పెట్టి సినిమాలు చేస్తుండడం, అవి బాక్సాఫీస్ దగ్గర అంతగా ఆడకపోతుండడంతో కొంత గ్యాప్ తీసుకోవాలని హీరో కిరణ్ కు అభిమానుల నుండి సలహాలు అందుతున్నాయి. అయినా కూడా వరుసగా సినిమాలు చేసుకుంటూ పోతూనే ఉన్నాడు కిరణ్ అబ్బవరం. ఇప్పటివరకు కిరణ్ తీసిన చిత్రాల్లో ఎస్ ఆర్ కళ్యాణ మండపం తప్ప మిగతావేవీ పెద్దగా ఆడినట్లు దాఖలాలు లేవు. మరి ఇప్పుడు చేస్తున్న చిత్రాలతోనైనా మంచి హిట్ అందుకుంటాడేమో చూడాలి.