Love Reddy : ప్రేమజంటను విడదీశాడని కోపంతో.. 'లవ్ రెడ్డి' నటుడిపై ప్రేక్షకురాలి దాడి
ఇటీవల కాలంలో, చిన్న సినిమాలు, పెద్ద సినిమాలు అనే తేడా లేకుండా కంటెంట్ బలమైనదే కావాలనే భావన ప్రేక్షకులలో పెరుగుతోంది. చిన్న చిన్న సినిమాలు కూడా సంచలన విజయాలను అందుకోవడంతో పాటు పాన్ ఇండియా స్థాయిలో కలెక్షన్స్ కూడా సాధించాయి. దీంతో చిన్న సినిమాలకు మరింత ఆదరణ లభిస్తోంది. ఈ క్రమంలో, 'లవ్ రెడ్డి' అనే ఇంట్రెస్టింగ్ చిత్రం ప్రేక్షకుల ముందుకు వచ్చింది.
సినిమాకు మంచి పాజిటివ్ టాక్
అయితే, ఈ సినిమా థియేటర్‌లో చూసిన మూవీ టీమ్ కు ఊహించని షాక్ ఎదురైంది. సినిమా చూస్తున్న సమయంలో, ఓ మహిళ చిత్రయూనిట్ లోని ఒక వ్యక్తికి దాడి చేసింది. ఆమె దాడి ఎందుకు చేసిందంటే, సినిమాల్లోని ఒక సన్నివేశంలో, ఒక వ్యక్తి ప్రేమ జంటను విడదీస్తున్న దృశ్యం ఆమెను తీవ్రంగా ప్రభావితం చేసింది. స్మరణ్ రెడ్డి దర్శకత్వంలో తెరకెక్కిన 'లవ్ రెడ్డి'లో అంజన్ రామచంద్ర, శ్రావణి జంటగా నటించారు. ఈ మూవీని గీతాన్స్ ప్రొడక్షన్స్, సెహెరి స్టూడియో, ఎమ్జీఆర్ ఫిలిమ్స్ బ్యానర్స్ కింద నిర్మించారు. ఈ సినిమా నిజ జీవిత ఘటనల ఆధారంగా రూపొందించబడింది. అక్టోబర్ 18న థియేటర్స్ లో విడుదలైంది. ఈ సినిమాకు మంచి పాజిటివ్ టాక్ వచ్చింది.
సోషల్ మీడియాలో వైరల్ గా మారిన సంఘటన
ఈ సినిమాలో, హీరో, హీరోయిన్ ను హీరోయిన్స్ తండ్రి విడదీస్తాడు. ఈ సినిమాలో విలన్ గా రామస్వామి నటించారు. సినిమా చివర్లోని క్లైమాక్స్ చూసి, ఒక మహిళ ఎమోషనల్ అయి, 'ఆ ప్రేమ జంటను ఎందుకు విడదీస్తావ్?' అని కోపంతో విలన్ పై దాడి చేసింది. ఈ ఘటనను చూసిన, మూవీ టీమ్ షాక్ కు గురై.. ఆమెను ఆపడానికి ప్రయత్నాలు చేశారు. ఇప్పుడు ఈ సంఘటనకు సంబంధించిన వీడియో సోషల్ మీడియాలో వైరల్ గా మారింది. అయితే, ఈ సంఘటన నిజమా? లేక సినిమా టీమ్ ప్లాన్ చేశారా? అని నెటిజన్లు అనుమానాలు వ్యక్తం చేస్తున్నారు.
