Vijay : విజయ్ సినిమా వల్లే నిలిచిపోయిన మార్నింగ్ షోలు.. ఇప్పుడు సీఎం విజయ్‌తోనే మళ్లీ ప్రారంభం!
ఈ వార్తాకథనం ఏంటి
తమిళ స్టార్ హీరో విజయ్ తమిళనాడు ముఖ్యమంత్రిగా బాధ్యతలు చేపట్టిన తర్వాత సినీ పరిశ్రమకు తనవంతు సహకారం అందిస్తున్నారు. పరిశ్రమ నుంచి వచ్చే విజ్ఞప్తులపై సానుకూలంగా స్పందిస్తున్నారు. తాజాగా థియేటర్లలో సినిమా ప్రదర్శన సమయాలకు సంబంధించి ఆయన ప్రభుత్వం కీలక నిర్ణయం తీసుకోబోతున్నట్లు తెలుస్తోంది. తమిళనాడులో గతంలో రద్దు చేసిన ఎర్లీ మార్నింగ్ షోలను మళ్లీ అందుబాటులోకి తీసుకొచ్చేందుకు సిద్ధమవుతున్నట్లు సమాచారం.
వివరాలు
2023లో తొక్కిసలాట.. అభిమాని మృతి
2023 సంక్రాంతి సందర్భంగా అజిత్ నటించిన 'తునివు', విజయ్ నటించిన 'వారిసు' సినిమాలు ఒకేసారి విడుదలయ్యాయి.
ఇద్దరు అగ్ర హీరోల చిత్రాలు ఒకే సమయంలో థియేటర్లలోకి రావడంతో అభిమానుల్లో భారీ ఉత్సాహం నెలకొంది.
అప్పట్లో ఉదయం షోలకు కూడా అనుమతులు ఉండటంతో తెల్లవారుజాము నుంచే థియేటర్ల వద్ద అభిమానులు పెద్ద సంఖ్యలో గుమిగూడారు.
ఈ క్రమంలో ఓ థియేటర్ వద్ద తొక్కిసలాట చోటుచేసుకుంది. ఈ ఘటనలో 19 ఏళ్ల అభిమాని ప్రాణాలు కోల్పోయాడు.
ఈ విషాద ఘటనతో అప్పటి తమిళనాడు ప్రభుత్వం అప్రమత్తమైంది. మద్రాస్ హైకోర్టు ఆదేశాల మేరకు అర్ధరాత్రి షోలతో పాటు తెల్లవారుజామున 4, 5 గంటలకు నిర్వహించే ఫ్యాన్స్ షోలను పూర్తిగా రద్దు చేసింది.
వివరాలు
ఉదయం 9 గంటల నుంచే షోలు
ఆ ఘటన తర్వాత తమిళనాడులో మిడ్‌నైట్ షోలు, ఎర్లీ మార్నింగ్ షోలు నిలిచిపోయాయి.
ఎంత పెద్ద స్టార్ హీరో సినిమా విడుదలైనా ఉదయం 9 గంటల నుంచే థియేటర్లలో ప్రదర్శనలు ప్రారంభించేవారు. అప్పటి నుంచి ఇదే విధానం కొనసాగుతోంది.
అయితే ఇప్పుడు మళ్లీ పాత పద్ధతిని తీసుకొచ్చే దిశగా ప్రభుత్వం అడుగులు వేస్తున్నట్లు తెలుస్తోంది.
వివరాలు
థియేటర్ల యజమానుల విజ్ఞప్తికి విజయ్ సర్కార్ సానుకూలం
థియేటర్ల యజమానుల అసోసియేషన్, ఫిల్మ్ ఛాంబర్ కొంతకాలంగా ప్రభుత్వానికి ఓ విజ్ఞప్తి చేస్తున్నాయి.
కనీసం స్టార్ హీరోల సినిమాల విడుదల సమయంలోనైనా ఎర్లీ మార్నింగ్ షోలకు అనుమతులు ఇవ్వాలని కోరుతున్నాయి.
తాజాగా సూర్య నటించిన 'సీన్' సినిమాకు కూడా ఈ తరహా షోల కోసం అనుమతి కోరినట్లు తెలుస్తోంది.
ఈ విజ్ఞప్తులపై విజయ్ ప్రభుత్వం సానుకూలంగా స్పందించినట్లు సమాచారం. తెల్లవారుజామున 4 గంటల షోలకు అనుమతి ఇవ్వకపోయినా.. ఉదయం 6 గంటల నుంచి సినిమాల ప్రదర్శనకు అవకాశం కల్పించేందుకు సిద్ధమవుతున్నట్లు వార్తలొస్తున్నాయి.
అయితే దీనిపై అధికారిక ప్రకటన వెలువడాల్సి ఉంది. ప్రభుత్వం ఈ నిర్ణయం తీసుకుంటే తమిళనాడులో చాలా కాలం తర్వాత మళ్లీ ఎర్లీ మార్నింగ్ షోలు ప్రారంభం కానున్నాయి.