నేషనల్ సినిమా డే: 99రూపాయలకే మల్టీప్లెక్స్ లో సినిమా చూసేయండి
నేషనల్ సినిమా డే రోజున 99రూపాయలకే మల్టీప్లెక్స్ థియేటర్లలో సినిమా చూసే అవకాశాన్ని మల్టీప్లెక్స్ అసోసియేషన్ ఆఫ్ ఇండియా కల్పిస్తోంది. ఈ ఏడాది అక్టోబర్ 13వ తేదీన నేషనల్ సినిమా డే ని జరపబోతున్నట్లు మల్టీప్లెక్స్ అసోసియేషన్ ప్రకటించింది. ఈ రోజున మల్టీప్లెక్స్ థియేటర్లలో 99రూపాయలు చెల్లించి సినిమాను చూడవచ్చు. ఈ ప్రోగ్రామ్ లో మల్టీప్లెక్స్ దిగ్గజాలైన పీవీఆర్ ఐనాక్స్, సినీ పోలీస్, మిరాజ్ వంటి థియేటర్లు పాల్గొంటున్నాయి. 99రూపాయలకే రిక్లయినర్ వంటి సీట్లలో కూర్చుని సినిమాను ఆనందించవచ్చు. గతేడాది జాతీయ సినిమా దినోత్సవాన్ని సెప్టెంబర్ 23వ తేదీన జరిపారు. అయితే అప్పుడు ఒక టికెట్ ధర 75రూపాయలుగా నిర్ణయించారు.
తెలుగు రాష్ట్రాల్లో వర్తించని ఆఫర్
జాతీయ సినిమా దినోత్సవం సందర్భంగా మల్టీప్లెక్స్ అసోసియేషన్ అందిస్తున్న ఈ ఆఫర్, తెలుగు రాష్ట్రాల్లో వర్తించడం లేదు. గతేడాది కూడా ఈ ఆఫర్ వర్తించలేదు. తెలంగాణ రాష్ట్రంలో మాత్రం మల్టీప్లెక్స్ అసోసియేషన్ నిర్ణయించినట్టుగా 99రూపాయల టికెట్ కాకుండా 112రూపాయలకు మల్టీప్లెక్స్ థియేటర్లో సినిమాలు చూడవచ్చు. ఆంధ్రప్రదేశ్ లో మాత్రం అలాంటి సౌకర్యం లేదు. 2022లో నిర్వహించిన జాతీయ సినిమా దినోత్సవానికి అనూహ్య స్పందన వచ్చింది. సినిమా డే రోజున 6.5 మిలియన్ల మంది మల్టీప్లెక్స్ థియేటర్లలో సినిమాలను వీక్షించారు. మరి ఈసారి ఎంతమంది వీక్షిస్తారో చూడాలి.
