Naga Chaitanya : నాగ్-చైతూ హ్యాట్రిక్ మూవీ.. మరోసారి స్క్రీన్ షేర్ చేసుకోనున్న తండ్రీకొడుకులు
ఈ వార్తాకథనం ఏంటి
టాలీవుడ్లో యువ హీరోగా ప్రత్యేక గుర్తింపు పొందిన అక్కినేని నాగ చైతన్య ప్రస్తుతం తన కెరీర్లో అత్యంత బిజీగా ఉన్నారు. విభిన్నమైన కథలను ఎంచుకుంటూ ప్రేక్షకులను ఆకట్టుకుంటున్న ఆయన, బాక్సాఫీస్ వద్ద కూడా తనదైన ముద్రను వేస్తున్నారు. తాజా సమాచారం ప్రకారం, ఆయన మరికొన్ని పెద్ద ప్రాజెక్టులకు గ్రీన్ సిగ్నల్ ఇచ్చినట్లు తెలుస్తోంది. ముఖ్యంగా, తన తండ్రి నాగార్జునతో కలిసి మరోసారి తెరపై కనిపించనున్నారనే వార్త అక్కినేని అభిమానుల్లో ఆనందాన్ని పెంచుతోంది.
వివరాలు
వాళ్లిద్దర్నీ మరోసారి కలపనున్న డైరెక్టర్
ఇప్పటికే 'మనం', 'బంగార్రాజు' వంటి సినిమాల్లో తండ్రీకొడుకుల కాంబినేషన్ ప్రేక్షకులను అలరించింది. ఇప్పుడు ఈ జోడీ మూడోసారి కలసి నటించబోతున్నట్లు సమాచారం. 'సోగ్గాడే చిన్ని నాయన', 'బంగార్రాజు' చిత్రాలకు దర్శకత్వం వహించిన కళ్యాణ్ కృష్ణ ఈ కొత్త సినిమాను రూపొందించేందుకు సిద్ధమవుతున్నారట. అక్కినేని కుటుంబానికి మంచి హిట్స్ ఇచ్చిన ఈ దర్శకుడు, మరోసారి ఫ్యామిలీ ఎంటర్టైనర్తో వీరిద్దరినీ ఒకే ఫ్రేమ్లో చూపించనున్నారని ఇండస్ట్రీలో చర్చ సాగుతోంది.
వివరాలు
కొత్త తరహా ప్రేమకథ..
ఇక నాగచైతన్య తన 25వ సినిమా కోసం కూడా ప్రత్యేకంగా ప్లాన్ చేస్తున్నట్లు తెలుస్తోంది. 'బెదురులంక 2012' ద్వారా గుర్తింపు పొందిన దర్శకుడు క్లాక్స్తో కలిసి ఈ ప్రాజెక్ట్ను రూపొందించనున్నారట. ఈ చిత్రం ప్రేమ, సంగీతాన్ని ప్రధానంగా తీసుకుని తెరకెక్కనుంది. స్క్రిప్ట్ పనులు ఇప్పటికే పూర్తయ్యాయని, త్వరలోనే అధికారిక ప్రకటన వెలువడే అవకాశముందని సమాచారం. చైతన్య ఇమేజ్కు సరిపోయేలా క్లాక్స్ కొత్త తరహా ప్రేమకథను సిద్ధం చేశారని తెలుస్తోంది.