నారాయణ అండ్ కో టీజర్: దేవుడికి డైటింగ్ నేర్పాలని చూసే తిక్కల్ ఫ్యామిలీ
లైఫ్ ఈజ్ బ్యూటిఫుల్ ఫేమ్ సుధాకర్ కొమాకుల హీరోగా వస్తున్న చిత్రం నారాయణ అండ్ కో టీజర్ రిలీజైంది. దర్శకుడు శేఖర్ కమ్ముల రిలీజ్ చేసిన ఈ టీజర్ ద్వారా ఇదొక నవ్వించే సినిమా అని అర్థమైంది. నారాయణ అండ్ కో ఫ్యామిలీకి తిక్క ఉంటుందని మొదట్లోనే చెప్పేసారు. మధ్యతరగతికి చెందిన నారాయణ, తిక్కల మనిషి. తన భార్యకు ఆరోగ్యం మీద శ్రద్ధ ఎక్కువ. దేవుడికి నైవేద్యం కూడా మిల్లెట్స్ పెట్టి దేవుడు కూడా డైట్ పాటించాలని అంటుంది. ఇక పెద్ద కొడుకు పాత్రలోని సుధాకర్ కొమాకులకు బెట్టింగ్ పిచ్చి. మూడవ కొడుక్కి ఫోటోగ్రాఫర్ అవ్వాలని ఆశ. ఈ తిక్కల్ ఫ్యామిలీని ఒక లోకల్ డాన్ తన లాభం కోసం వాడుకోవాలని చూస్తాడు.
ప్రొడ్యూసర్ గా మారిన సుధాకర్ కొమాకుల
తిక్కల్ ఫ్యామిలీతో లోకల్ డాన్ కు సమస్య వస్తుందా? లేదా లోకల్ డాన్ వల్ల తిక్కల్ ఫ్యామిలీ సమస్యల్లో పడుతుందా అనేది సినిమా చూస్తే తెలుస్తుంది. టీజర్ చాలా ఫ్రెష్ గా ఉంది. నవ్వించే అంశాలు పుష్కలంగా ఉన్నట్లు అర్థమవుతోంది. సుధాకర్ కొమాకుల కొత్తగా కనిపిస్తున్నాడు. తండ్రి పాత్రలో చేస్తున్న దేవి ప్రసాద్, తల్లి పాత్రలో చేస్తున్న ఆమని, తమ తమ పాత్రల్లో ఇమిడిపోయినట్లుగా కనిపిస్తున్నారు. చిన్నపాపిశెట్టి దర్శకత్వం వహిస్తున్న ఈ సినిమాను పాపిశెట్టి ఫిలిమ్ ప్రొడక్షన్, సుఖ మీడియా బ్యానర్లలో పాపిశెట్టి బ్రదర్స్, సుధాకర్ కొమాకుల సంయుక్తంగా నిర్మిస్తున్నారు. అరతి పోడి, పూజా కిరణ్ హీరోయిన్లుగా కనిపిస్తున్న ఈ సినిమాకు సురేష్ బొబ్బిలి, డాక్టర్ జ్యోస్యభట్ల, నాగవంశీ కలిసి సంగీతం అందిస్తున్నారు.
