నార్నె నితిన్ నటించిన మ్యాడ్ మూవీ విడుదల వాయిదా.. తేల్చేసిన సాంగ్ ప్రోమో?
జూనియర్ ఎన్టీఆర్ బావమరిది నార్నె నితిన్ హీరోగా నటించిన కాలేజ్ డ్రామా మ్యాడ్ మూవీ సెప్టెంబర్ 28వ తేదీన విడుదల అవుతుందని మేకర్స్ ప్రకటించారు. తాజాగా ఈ సినిమా నుండి విడుదలైన పాట ప్రోమో చూస్తుంటే సెప్టెంబర్ 28వ తేదీన వచ్చే అవకాశం లేనట్టు కనిపిస్తుంది. ప్రౌడ్ సే సింగిల్ పాట ప్రోమోను ఈరోజు విడుదల చేసిన మేకర్స్, ప్రోమో వీడియోలో విడుదల తేదీని ప్రకటించలేదు. ఈ లెక్కన 28న విడుదలయ్యే అవకాశం లేదని అంటున్నారు. సలార్ సినిమా 28వ తేదీ నుండి తప్పుకోవడంతో చాలా సినిమాలు ఆ రోజున ప్రేక్షకుల ముందుకు వచ్చేందుకు రెడీ అయ్యాయి. వాటన్నింటి మధ్యలో రావడం కన్నా మరో రోజున రావాలని మ్యాడ్ టీమ్ అనుకుంటున్నట్లు సమాచారం.
అక్టోబర్ 6వ తేదీన రానున్న మ్యాడ్?
అన్నీ కుదిరితే అక్టోబర్ 6వ తేదీన మ్యాడ్ సినిమాను థియేటర్లలో రిలీజ్ చేయాలని మేకర్స్ అనుకుంటున్నారమ్ని వినిపిస్తోంది. మరి కొత్త విడుదల తేదీని మ్యాడ్ టీమ్ ప్రకటిస్తుందా? లేదా పాత విడుదల తేదీన సినిమాను రిలీజ్ చేస్తుందా అన్నది చూడాలి. మ్యాడ్ సినిమాతో హారికా సూర్యదేవర నిర్మాతగా మారుతున్నారు. సితార ఎంటర్ టైన్మెంట్స్, ఫార్ఛూన్ ఫోర్ సినిమాస్ బ్యానర్లో రూపొందుతున్న ఈ సినిమాకు ఎస్ సౌజన్య మరో నిర్మాతగా ఉన్నారు. నార్నె నితిన్ తో పాటు సంగీత్ శోభన్, రామ్ నితిన్ నటిస్తున్న ఈ సినిమాలో శ్రీ గౌరి ప్రియా రెడ్డి, అననతికా సనిల్ కుమార్ ఇతర ప్రధాన పాత్రల్లో నటిస్తున్నారు.
