నవీన్ పొలిశెట్టి తర్వాతి చిత్రంపై క్లారిటీ, బొకే ఇచ్చి మరీ ప్రకటించేసారు
ఏజెంట్ సాయి శ్రీనివాస ఆత్రేయ సినిమాతో హీరోగా మారిన నవీన్ పొలిశెట్టి, ఆ తర్వాత జాతి రత్నాలు సినిమాతో సూపర్ సక్సెస్ అందుకున్నారు. ప్రస్తుతం మిస్ శెట్టి మిస్టర్ పొలిశెట్టి సినిమా ద్వారా ప్రేక్షకులకు మంచి వినోదాన్ని అందించాడు. హీరోగా హ్యాట్రిక్ విజయాలు అందుకున్న నవీన్ పోలిశెట్టికి టాలీవుడ్ లోని టాప్ బ్యానర్ల నుండి అవకాశాలు వస్తున్నాయి. తాజాగా మైత్రీ మూవీ మేకర్స్, నవీన్ పోలిశెట్టితో సినిమాను ఖాయం చేసుకుంది. ఈ మేరకు తమ సోషల్ మీడియా ఖాతా ద్వారా అధికారికంగా వెల్లడి చేసింది. హ్యాట్రిక్ విజయాలు అందుకున్న నవీన్ పోలిశెట్టి కి బొకే అందించి అభినందనలు తెలియజేసిన మైత్రీ మూవీ మేకర్స్, త్వరలో ఎంటర్ టైనింగ్ సినిమాతో వస్తున్నామని తెలియజేసింది.
దర్శకుడి వివరాలు వెల్లడించని మైత్రీ మూవీ మేకర్స్
నవీన్ పొలిశెట్టితో సినిమా చేస్తున్నామని వెల్లడి చేసిన మైత్రీ మూవీ మేకర్స్, ఆ సినిమా గురించి అంతకుమించిన సమాచారం బయట పెట్టలేదు. కాకపోతే నవీన్ పోలిశెట్టి గత చిత్రాల మాదిరిగానే వినోదాన్ని పంచుతుందని తెలిపింది. ఈ చిత్రానికి దర్శకుడు ఎవరనేది కూడా ఇంకా తెలియదు. అదలా ఉంచితే, మిస్ శెట్టి మిస్టర్ పొలిశెట్టి చిత్రంలో అనుష్క శెట్టి హీరోయిన్ గా నటించారు. స్టాండప్ కమెడియన్ గా నవీన్ పోలిశెట్టి కనిపించారు. యూవీ క్రియేషన్స్ బ్యానర్ లో రూపొందిన ఈ సినిమాకు మహేష్ బాబు పి దర్శకత్వం వహించారు.
