NBK112 Buzz: ఎన్బీకే112లో ముఖ్యమంత్రిగా బాలకృష్ణ.. రాజకీయ నేపథ్యంలో మాస్ కథ
ఈ వార్తాకథనం ఏంటి
నందమూరి అభిమానులకు పూనకాలు తెప్పించే వార్త టాలీవుడ్ వర్గాల్లో చక్కర్లు కొడుతోంది. 'గాడ్ ఆఫ్ మాసెస్'గా పేరుగాంచిన నందమూరి బాలకృష్ణ, ప్రముఖ దర్శకుడు కొరటాల శివ కలయికలో రూపొందనున్న ఎన్బీకే112 చిత్రం అధికారికంగా ఖరారైంది. ఈ సినిమాలో బాలయ్య పోషించే పాత్రపై వస్తున్న సమాచారం ఇప్పుడు చిత్రసీమలో చర్చనీయాంశంగా మారింది. కొరటాల శివ తన చిత్రాల్లో సామాజిక సందేశాన్ని ప్రధానంగా ఉంచుతూ, కథానాయకుడి పాత్రను ఘనంగా తీర్చిదిద్దడంలో ప్రత్యేకత చూపుతారు. ఇదే విధంగా ఎన్బీకే112 కోసం ఆయన బలమైన రాజకీయ కథను సిద్ధం చేసినట్లు తెలుస్తోంది. ఇందులో బాలకృష్ణ ఒక పవర్ఫుల్ ముఖ్యమంత్రి పాత్రలో కనిపిస్తారని సమాచారం.
వివరాలు
సినిమా థీమ్ను స్పష్టం చేస్తున్న ట్యాగ్లైన్
గతంలో 'భరత్ అనే నేను' చిత్రంలో మహేష్ బాబును ముఖ్యమంత్రిగా చూపించిన కొరటాల, ఇప్పుడు బాలయ్య మార్క్ మాస్ ఎలివేషన్లతో ఆ పాత్రను మరింత పవర్ఫుల్గా తీర్చిదిద్దబోతున్నారట. ఈ సినిమా అనౌన్స్మెంట్ పోస్టర్పై ఉన్న "Power Meets Purpose, Mass Becomes A Movement" అనే ట్యాగ్లైన్ సినిమా థీమ్ను స్పష్టం చేస్తోంది. కేవలం రాజకీయాలకే పరిమితం కాకుండా, సమాజానికి అవసరమైన గొప్ప లక్ష్యం కోసం ముఖ్యమంత్రి చేసే పోరాటమే ఈ కథగా ఉండబోతుందని సినీ విశ్లేషకులు భావిస్తున్నారు. రాజకీయ నేపథ్యంతో కూడిన బాలయ్య సంభాషణల శైలి, ఆయన గంభీరత కలిసి థియేటర్లలో భారీ స్పందన తీసుకురావడం ఖాయమని అభిమానులు నమ్మకం వ్యక్తం చేస్తున్నారు.
వివరాలు
ఎన్బీకే111 పూర్తయిన వెంటనే కొరటాల శివ ప్రాజెక్ట్ ప్రారంభం
ప్రస్తుతం బాలకృష్ణ, గోపీచంద్ మలినేని దర్శకత్వంలో రూపొందుతున్న ఎన్బీకే111 చిత్రీకరణలో నిమగ్నమై ఉన్నారు. అది పూర్తయిన వెంటనే కొరటాల శివ ప్రాజెక్ట్ ప్రారంభం కానుంది. ఇటీవల దేవరతో విజయాన్ని అందుకున్న కొరటాల శివ, ఈ చిత్రంతో మరోసారి తన ప్రత్యేక శైలిని చూపించేందుకు సిద్ధమవుతున్నారు. యువసుధ ఆర్ట్స్, ఎస్ఎల్వీ సినిమాస్ సంయుక్తంగా ఈ భారీ చిత్రాన్ని నిర్మిస్తున్నాయి.