వేసవి నుండి షిఫ్ట్ అయ్యి సరికొత్త రిలీజ్ డేట్ లో వస్తున్న హరిహర వీరమల్లు?
పవర్ స్టార్ పవన్ కళ్యాణ్ వరుస సినిమాలతో బిజీగా ఉన్నారు. అటు రాజకీయంలో దూకుడుగా ఉంటూనే వరుసగా సినిమాలు చేస్తున్నారు. క్రిష్ దర్శకత్వంలో రూపొందుతున్న హరిహర వీరమల్లు, హరీష్ శంకర్ దర్శకత్వంలోని ఉస్తాద్ భగత్ సింగ్, సుజిత్ తెరకెక్కిస్తోన్న ఓజీ చిత్రాలు లైనప్ లో ఉన్నాయి. ఇవే కాకుండా ఓజీ చిత్రానికి పార్ట్ 2 కూడా ఉంటుందని వినిపించింది. సినిమాల లిస్ట్, పెద్దగానే ఉంది కానీ వాటి రిలీజ్ లు మాత్రం చాలా దూరంలో ఉన్నాయి. ఓజీ, ఉస్తాద్ భగత్ సింగ్ చిత్రాల షూటింగ్ ఇంకా మొదలవలేదు కాబట్టి వీటిని తెరమీద చూడాలంటే వచ్చే సంవత్సరం వరకూ ఆగాల్సిందేనని చెప్పుకుంటున్నారు. ఇక వేసవిలో వస్తుందనుకున్న హరిహర వీరమల్లు చిత్రం వాయిదా పడిందని తెలుస్తోంది.
దసరా కానుకగా రానున్న హరిహర వీరమల్లు
పీరియాడిక్ డ్రామాగా రూపొందుతున్న హరిహర వీరమల్లు సినిమాను దసరా కానుకగా రిలీజ్ చేయాలని ప్లాన్ చేస్తున్నట్లు తెలుస్తోంది. షూటింగ్ ఇంకా మిగిలే ఉండడం వల్ల ఆలస్యమవుతుందని అంటున్నారు. ఇదే నిజమైతే వేసవిలో సినిమా రిలీజ్ అవుతుందనుకుంటున్న అభిమానులకు నిరాశ తప్పదు. పాన్ ఇండియా రేంజ్ లో ఐదు భాషల్లో విడుదలవుతున్న ఈ సినిమాలో, బందిపోటు దొంగగా పవన్ కళ్యాణ్ కనిపించనున్నారు. ఔరంగజేబు కాలం నాటి కథతో రూపొందుతున్న ఈ సినిమాలో, కోహీనూర్ వజ్రాన్ని పవన్ కళ్యాణ్ పాత్ర దొంగిలిస్తుందని సమాచారం. నిధి అగర్వాల్ హీరోయిన్ గా చేస్తున్న ఈ సినిమాను మెగా సూర్య ప్రొడక్షన్ బ్యానర్ పై దయాకర్ రావ్ నిర్మిస్తున్నారు. ఎమ్ఎమ్ కీరవాణి సంగీతం అందిస్తున్నారు.
