ఆర్ఆర్ఆర్ కు సమానంగా ఎన్టీఆర్ 30: వెల్లడించిన ఎన్టీఆర్
ఆర్ఆర్ఆర్ సినిమాకు ఆస్కార్ అవార్డ్ రావడంతో యావత్ భారతదేశం ఆనందంగా ఉంది. భారత జెండాను ఆస్కార్ వేదిక మీద నాటు నాటు అంటూ ఎగరవేసిన ఆర్ఆర్ఆర్ బృందంపై ప్రశంసల వర్షం కురుస్తోంది. ఆ ప్రశంసల వర్షంలో ఆర్ఆర్ఆర్ టీమ్ తడిసి ముద్దవుతుండగా, ఆర్ఆర్ఆర్ హీరో ఎన్టీఆర్, తన అభిమానులకు మరో ఆసక్తికర విషయాన్ని అందించాడు. ఆస్కార్ అవార్డుల అనంతరం, అమెరికన్ మీడియాతో ముచ్చటించిన ఎన్టీఆర్, ఆస్కార్ రావడం ఆనందంగా ఉందని చెబుతూ, తన తర్వాతి సినిమా కూడా ఆర్ఆర్ఆర్ స్థాయిలో ఉంటుందనీ, ఈ నెలలో ఆ సినిమా షూటింగ్ మొదలవుతుందని, ఆ విషయం ఎక్సైటింగ్ గా ఉందని అన్నాడు. దీంతో ఎన్టీఆర్ అభిమానులు సంతోషంగా ఉన్నారు.
ఎన్టీఆర్ 30 మొదలు విషయంలో నిరాశలో ఉన్న అభిమానులు
అటు ఆస్కార్ ఆనందంతో పాటు ఎన్టీఆర్ 30 షూటింగ్ మొదలవుతుందన్న మాటలు ఎన్టీఆర్ నోటి నుండి రావడం అభిమానులకు ఆనందాన్ని అందిస్తోంది. ఆర్ఆర్ఆర్ వచ్చి సంవత్సరం అవుతున్నా కూడా ఎన్టీఆర్, తన తర్వాతి చిత్రాన్ని ఇంకా మొదలెట్టలేదనే చిన్నపాటి నిరాశ ఎన్టీఆర్ అభిమానుల్లో ఉంది. ఆస్కార్ తో ఆర్ఆర్ఆర్ పనులన్నీ పూర్తవడంతో, ఇక పూర్తి దృష్టి తన తర్వాతి సినిమానే పెట్టేలా కనిపిస్తున్నాడు ఎన్టీఆర్. ఎన్టీఆర్ కెరీర్ లో 30వ సినిమాగా రూపొందుతున్న ఈ సినిమాలో జాన్వీ కపూర్ హీరోయిన్ గా చేస్తోంది. కొరటాల శివ దర్శకత్వం వహిస్తున్న ఈ సినిమా, 2024 ఏప్రిల్ 5వ తేదీన విడుదల అవుతుంది.
