సమంతకు ధైర్యం చెబుతూ రాహుల్ రవీంద్ర గిఫ్ట్.. ఆందోళనలో అభిమానులు
స్టార్ హీరోయిన్ సమంత ఆరోగ్యం విషయంలో అభిమానులు ఆందోళన చెందుతున్నారు. యశోద సినిమా రిలీజ్ సమయంలో తన అనారోగ్యం గురించి అందరితో పంచుకుంది సమంత. చాలా కొద్దిమందిలో కనిపించే మయోసైటిస్ అనే వ్యాధితో బాధపడుతున్నట్లు వెల్లడి చేసింది . ప్రస్తుతం ఆ వ్యాధితో పోరాడుతున్నట్లు ఆమె చెప్పింది. ఐతే గత కొన్ని రోజులుగా తన హెల్త్ విషయంలో సమంత మరింత ఇబ్బందిపడుతోందని సోషల్ మీడియాలో పుకార్లు వచ్చాయి. ఈ పుకార్లు నిజమో కాదో తెలియదు కానీ ప్రస్తుతం హీరో రాహుల్ రవీంద్ర, సమంతకు ఒక ఫోటో ఫ్రేమ్ ని బహుమతిగా ఇచ్చారు. సందేశాత్మక వాక్యాలతో నిండి ఉన్న ఫోటో ఫ్రేమ్ ని ఫోటో తీసి సోషల్ మీడియాలో అభిమానులతో పంచుకుంది సమంత.
ఉక్కు నరం సమంత
ఆ ఫ్రేమ్ లో కొన్ని వాక్యాలు ఇలా ఉన్నాయి. నువ్వొక చిమ్మ చీకటిగా ఉన్న సొరంగంలో చిక్కుకున్నావు. నీ కాళ్ళు ముందుకు కదలట్లేదు. కానీ ఆగిపోవద్దు. నడుస్తూనే ఉండు. అప్పుడే ఆ గుహలోకి వెలుతురు వస్తుంది. నీది ఉక్కు నరం, ఆలస్యమైనా నువ్వు సాధించి తీరతావు అని అందులో కొటేషన్ ఉంది. దీంతో అభిమానుల్లో ఆందోళన మొదలయ్యింది. సమంత ఆరోగ్యంపై అనేక అనుమానాలు వ్యక్తం అవుతున్నాయి. ప్రస్తుతం సమంత చేతిలో ఖుషీ సినిమా ఉంది. విజయ్ దేవరకొండ ఈ సినిమాలో హీరోగా కనిపిస్తున్నారు. శివనిర్వాణ దర్శకత్వం వహిస్తున్న ఈ సినిమా షూటింగ్ ప్రస్తుతం హోల్డ్ లో ఉంది. సమంత తిరిగొచ్చాక మళ్ళీ మొదలయ్యే అవకాశం ఉందని అనుకుంటున్నారు.
