ఓటీటీ: కృష్ణవంశీ డైరెక్ట్ చేసిన రంగమార్తాండ ఓటీటీలోకి వచ్చేసింది
ఈ వార్తాకథనం ఏంటి
చాలా రోజుల తర్వాత రంగమార్తాండ సినిమాతో ప్రేక్షకుల ముందుకు వచ్చాడు కృష్ణవంశీ. నటుడి జీవితంలో జరిగే సంఘటనలను, ఎదుర్కొన్న అనుభవాలను గుండెకి హత్తుకునే విధంగా తెరమీద చూపించాడు కృష్ణవంశీ.
ఉగాది సందర్భంగా థియేటర్లలో సందడి చేసిన రంగమార్తాండ, ప్రేక్షకులను పెద్దగా ఆకర్షించలేకపోయింది. ఈ కారణంగా విడుదలైన అతి కొద్ది రోజుల్లోనే ఓటీటీలో ప్రత్యక్షమైంది.
రంగమార్తాండ చిత్రాన్ని అమెజాన్ ప్రైమ్ వీడియో ద్వారా ఈరోజు నుంచి ఇంట్లోనే చూడవచ్చు. ఈ విషయమై చిత్ర బృందం ఎలాంటి అధికారిక ప్రకటన చేయలేదు. కాకపోతే ఆల్రెడీ అమెజాన్ ప్రైమ్ లోకి వచ్చేసింది రంగమార్తాండ.
ఈ సినిమాలో ప్రకాష్ రాజ్ బ్రహ్మానందం, రమ్యకృష్ణ, రాహుల్ సిప్లిగంజ్, ప్రధాన పాత్రల్లో కనిపించారు.
రంగమార్తాండ
ప్రధాన ఆకర్షణగా నిలిచిన బ్రహ్మానందం
మరాఠీలో విజయమందుకున్న నటసామ్రాట్ అనే చిత్రాన్ని తెలుగులో రంగమార్తాండగా రీమేక్ చేశారు కృష్ణవంశీ.
రంగమార్తాండ కథ ఏంటంటే:
రంగస్థలం కళాకారుడిగా ఎన్నో విజయాలు అందుకున్న ప్రకాష్ రాజ్ పాత్ర, తన జీవితంలో జరిగే సంఘటనలు ఎదుర్కోలేక పోతాడు. రంగస్థలం మీద నటించిన నటుడికి నిజ జీవితంలో నటించడం రాకపోవడంతో ఎన్నో ఇబ్బందులు ఎదుర్కొంటాడు.
ఆ ఇబ్బందులు తన జీవిత ప్రయాణాన్ని ఎటువైపు తీసుకెళ్లాయనేదే కథ.
ఈ సినిమాలో బ్రహ్మానందం పాత్ర గురించి ప్రత్యేకంగా చెప్పుకోవాలి. ఇదివరకెప్పుడూ ఏ సినిమాల్లో కనిపించని బ్రహ్మానందం ఇందులో కనిపిస్తారు. బ్రహ్మానందం, ప్రకాష్ రాజ్ ల మధ్య స్నేహం ఈ సినిమాకు ప్రధాన ఆకర్షణ.
ఈ సినిమాకు ఇళయరాజా సంగీతం అందించారు.