రవితేజ, గోపిచంద్ మలినేని కాంబాలో మరో సినిమా.. ఆ సెంటిమెంట్ మళ్లీ వర్కౌట్ అవుతుందా?
గతేడాది ధమాకా సినిమాతో హిట్ ట్రాక్‌లో వచ్చిన మాస్ మహారాజ రవితేజ ఈ ఏడాది 'రావణాసుర' మువీతో ప్రేక్షకుల ముందుకు వచ్చాడు. ఈ సినిమా అంచనాలను నిలబెట్టుకోలేకపోయింది. ప్రస్తుతం రవితేజ కథనాయకుడిగా టైగర్ నాగేశ్వరరావు సినిమాను పాన్ ఇండియా స్థాయిలో తెరకెక్కిస్తున్నారు. ఈ తరుణంలో మరో సినిమాకు రవితేజ గ్రీన్ సిగ్నల్ ఇచ్చాడు. డాన్ శ్రీను, బలుపు, క్రాక్ సినిమాలతో గతంలో సూపర్ హిట్ ఇచ్చిన దర్శకుడు గోపిచంద్ మలినేనితో రవితేజ నాలుగోసారి కలిసి పనిచేయనున్నాడు. మైత్రీ మూవీస్ మేకర్స్ పై ఈ సినిమా వస్తున్నట్లు ఓ పోస్టర్ ను నేడు రిలీజ్ చేశారు. ఈ సినిమాను నవీన్ ఎర్నేనీ, వై.రవిశంకర్ సంయుక్తంగా నిర్మిస్తున్నారు.
మైత్రీ మూవీస్ బ్యానర్ లో మూడో చిత్రాన్ని చేస్తున్న రవితేజ
RT4GM కోసం మాస్ మహారాజ రవితేజ, డైరెక్టర్ గోపీచంద్ మలినేని మరోసారి చేతులు కలిపారు. ఈ చిత్రానికి తమన్ స్వరాలు అందిస్తున్నాడు. త్వరలోనే ఈ సినిమాకు సంబంధించిన పూర్తి వివరాలను వెల్లడించనున్నారు. మైత్రీ మూవీ మేకర్స్ బ్యానర్‌లో రవితేజ మూడోసారి కలిసి పనిచేయనున్నాడు. గతంలో 'అమర్ అక్బర్ అంటోని', వాల్తేరు వీరయ్య చిత్రాల్లో రవితేజ నటించాడు. అటు మైత్రీ బ్యానర్ లో గోపిచంద్ మలినేనికి ఇది రెండో చిత్రం కావడం విశేషం. రవితేజ ప్రస్తుతం వంశీ డైరక్షన్‌లో టైగర్ నాగేశ్వరరావు సినిమాను చేస్తున్నాడు. ఈ సినిమా తర్వాత రవితేజ, గోపిచంద్ మలినేని కాంబో పట్టాలెక్కనుంది.
