అలనాటి అందాల నటి సీమ డియో కన్నుమూత.. దయనీయంగా చివరి రోజులు
గత మూడేళ్ళుగా ఆల్జీమర్స్ వ్యాధితో ఇబ్బంది పడుతున్న ప్రముఖ బాలీవుడ్ నటి సీమ డియో బుధవారం ఉదయం 9గంటల ప్రాంతంలో ముంబైలో తన నివాసంలో కన్నుమూశారు. 81ఏళ్ళ వయసులో అనారోగ్య కారణాల కారణంగా సీమా డియో మరణించారు. సీమా డియో మరణ వార్తను ఆమె కుమారుడు అభినయ్ డియో వెల్లడించారు. చివరి రోజుల్లో మతిమరుపుతో తీవ్ర ఇబ్బందులు ఎదుర్కొన్న సీమా డియో, ఎలా నడవాలో కూడా మర్చిపోయిందని, ప్రతీ చిన్న విషయాన్ని మర్చిపోయేదని అభినయ్ డియో తెలియజేసాడు. కొన్నాళ్లుగా డిమెంటియాతో బాధపడుతున్న సీమా డియో‌కు ఆల్జీమర్స్ వ్యాధి అటాక్ అయ్యిందని, దాని కారణంగా శరీరంలో అవయవాలు ఒక్కొక్కటిగా పాడయ్యాయని అభినయ్ అన్నారు.
హిందీ, మరాఠీ సినిమాల్లో నటించిన సీమా డియో
సీమా డియో హిందీ, మరాఠీ భాషల్లో కలిపి 80కి పైగా చిత్రాల్లో నటించారు. ఆమె నటించిన చిత్రాల్లో ఆనంద్, కొరా కాగజ్ చెప్పుకొదగ్గవి. సీమా డియో భర్త రమేష్ డియో కూడా హిందీ, మరాఠీ చిత్ర పరిశ్రమలో నటుడిగా పనిచేసారు. 93ఏళ్ళ వయసులో రమేష్ డియో 2022లో చనిపోయారు. సీమా డియో దంపతులకు ఇద్దరు కుమారులు అజింక్యా డియో, అభినయ్ డియో ఉన్నారు. అజింక్యా డియో నటుడిగా సంసార్, ఇంద్రజీత్ మొదలగు చిత్రాల్లో నటించాడు. అభినయ్ డియో దర్శకుడిగా మారి ఢిల్లీ బెల్లీ, ఫోర్స్ చిత్రాలను తెరకెక్కించాడు. సీమా డియో అంత్యక్రియలు ఈరోజు సాయంత్రం 5గంటలకు ముంబైలోని శివాజీ పార్క్ లో జరగనున్నాయి.
