కాంతారా సినిమా అభిమానులకు గుడ్ న్యూస్: మొదటి డ్రాఫ్ట్ పూర్తి చేసిన రిషబ్ శెట్టి
ఈ వార్తాకథనం ఏంటి
ఒక సినిమాకు పాన్ ఇండియా అర్హత రావాలంటే ఆ సినిమాను ఐదు భాషల్లో రిలీజ్ చేస్తే చాలదు, అన్ని భాషల వారు ఆ సినిమాను ఆదరించాలి. ఈ విషయంలో కాంతారా పర్ఫెక్ట్ పాన్ ఇండియా సినిమాగా నిలుస్తుంది.
కన్నడలో రిలీజైన కొన్ని రోజుల తర్వాత ఇతర భాషల్లోకి వచ్చిన ఈ చిత్రం, ఇండియన్ బాక్సాఫీసు దగ్గర తన సత్తాను చాటుకుంది. కేవలం 15కోట్లతో నిర్మించిన ఈ సినిమాకు, 400కోట్లకు పైగా వసూళ్ళు వచ్చాయి.
ప్రస్తుతం కాంతారా సినిమాకు ప్రీక్వెల్ రాబోతుంది. అవును, సాధారణంగా ఏ దర్శకులైనా సీక్వెల్ తీయాలనుకుంటారు. కానీ దర్శకుడు రిషబ్ శెట్టి మాత్రం, కాంతారా సినిమాకు ముందు ఏం జరిగిందో తన నెక్స్ట్ సినిమాలో చూపించబోతున్నాడు.
Details
వర్షాకాంలో కాంతారా ప్రీక్వెల్ షూటింగ్ మొదలు
గతకొన్ని రోజులుగా కాంతారా ప్రీక్వెల్ స్క్రిప్ట్ మీద పనిచేస్తున్న రిషబ్ శెట్టి, మొదటి డ్రాఫ్టును పూర్తి చేసాడట. మరికొద్ది రోజుల్లో షూటింగ్ జరగబోతుందని అంటున్నారు.
షూటింగ్ లోకేషన్లను వెతికే పనిలో చిత్రబృందం ఉందని సమాచారం. వర్షాకాలం మొదట్లో కాంతారా ప్రీక్వెల్ షూటింగ్ మొదలవుతుందని వినిపిస్తోంది. అన్నీ కుదిరితే వచ్చే సంవత్సరం వేసవిలో కాంతారా ప్రీక్వెల్ రిలీజ్ అయ్యే అవకాశం ఉంది.
మొత్తానికి ఎప్పుడెప్పుడా అని ఎదురుచూస్తున్న కాంతారా ప్రీక్వెల్, అతి త్వరలోనే స్టార్ట్ కాబోతుందన్న మాట. కాంతారా సినిమాను హాంబలే ఫిలిమ్స్ నిర్మించింది. రిషబ్ శెట్టి ప్రధాన పాత్రలో కనిపించిన కాంతారా సినిమాలో సప్తమి గౌడ, ఫీమేల్ లీడ్ లో మెరిసింది.