శాకుంతలం ట్రైలర్ రిలీజ్: గుణశేఖర్ మాటలకు ఏడ్చేసిన సమంత
సమంత నటించిన మొట్టమొదటి పాన్ ఇండియన్ మూవీ శాకుంతలం ప్రేక్షకుల ముందుకు రావడానికి సిద్ధమవుతోంది. మహాశివరాత్రి కానుకగా ఫిబ్రవరి 17వ తేదీన ప్రపంచ వ్యాప్తంగా రిలీజ్ అవుతోంది. ఈ నేపథ్యంలో ఈరోజు శాకుంతలం ట్రైలర్ ని లాంచ్ చేసింది చిత్రబృందం. కాళిదాసు రచించిన అభిజ్ఞాన శాకుంతలంలోని శకుంతల, దుష్యంతుల ప్రేమ కథని తెర మీద చూపించబోతున్నామని ట్రైలర్ లో ప్రకటించారు. విశ్వామిత్రుడు, మేనకల కూతురు శకుంతల, దుశ్యంతుడి ప్రేమలో ఎలా పడిందీ, వారిద్దరి ప్రేమ జీవితం, ఆ తర్వాత దుష్యంతుడు శకుంతలను తిరస్కరించడం సహా అన్నీ ట్రైలర్ లో చూపించారు. సినిమాని చాలా కలర్ ఫుల్ గా కన్నుల విందుగా తీర్చిదిద్దినట్లు ట్రైలర్ చూస్తుంటే అర్థమవుతోంది.
ట్రైలర్ లాంచ్ ఈవెంట్ లో ఏడ్చేసిన సమంత
ట్రైలర్ లాంచ్ ఈవెంట్ ని చాలా ఘనంగా ప్లాన్ చేసింది చిత్రబృందం. ఇక్కడ గుణశేఖర్ మాట్లాడుతూ, శాకుంతలం సినిమాలో ఇద్దరు కథానాయకులు ఉన్నారని, కథ పరంగా దేవ్ మోహన్ హీరో అయితే సినిమా పరంగా హీరో సమంత అని చెప్పుకొచ్చారు. ఈ మాటలతో సమంత కళ్ళలోంచి కన్నీళ్ళు వచ్చాయి. భావోద్వేగాన్ని ఆపుకోలేక కన్నీళ్ళు కార్చింది సమంత. ఈ లాంచ్ లో సమంత మాట్లాడుతూ, ఈ ట్రైలర్ లాంచ్ కి ఎలాగైనా రావాలని ఫిక్స్ అయ్యానని, అందుకే బలం తెచ్చుకుని ఇక్కడికి వచ్చానని అంది. సమంత కెరీర్లో అత్యంత భారీ బడ్జెట్ తో రూపొందిన ఈ సినిమా, పాన్ ఇండియా రేంజ్ లో తెలుగు, తమిళం, హిందీ, కన్నడ, మళయాలం భాషల్లో విడుదల అవుతుంది.
