షార్ట్ ఫిల్మ్ మేకర్స్ తో సంతోష్ శోభన్ కొత్త చిత్రం జోరుగా హుషారుగా షికారు పోదమ
యంగ్ హీరో సంతోష్ శోభన్ హిట్ కోసం ఎంతగానో పరితపిస్తున్నాడు. ఈ ఏడాది సంతోష్ శోభన్ హీరోగా కళ్యాణం కమనీయం, శ్రీదేవి శోభన్ బాబు, అన్నీ మంచి శకునములే, ప్రేమ్ కుమార్ అనే నాలుగు సినిమాలు విడుదలయ్యాయి. వీటిలో ఒక్క చిత్రం కూడా ఆశించిన విజయాన్ని అందుకోలేదు. ప్రస్తుతం సంతోష్ శోభన్ నుండి మరో కొత్త చిత్రం రాబోతుంది. అప్పట్లో షార్ట్ ఫిలిమ్స్ ద్వారా పేరు తెచ్చుకున్న ఎం ఆర్ ప్రొడక్షన్స్ సంస్థ సంతోష్ శోభన్ హీరోగా జోరుగా హుషారుగా షికారు పోదమ అనే టైటిల్ తో సినిమాను తెరకెక్కిస్తోంది. ఈ చిత్ర టైటిల్ తో పాటు మోషన్ పోస్టర్ ని కూడా రిలీజ్ చేశారు. ఈ కార్యక్రమానికి దర్శకుడు క్రిష్ హాజరయ్యారు.
రొమాంటిక్ ఎంటర్ టైనర్ గా రూపొందుతున్న చిత్రం
జోరుగా హుషారుగా షికారు పోదమ అనే మోషన్ పోస్టర్లో భారత దేశ చిత్రపటం, కారు, బస్సు వంటి వాహనాలను చూపించారు. రొమాంటిక్ ఎంటర్టైనర్ గా రూపొందుతున్న ఈ సినిమా, ట్రావెలింగ్ నేపథ్యంలో ఉండనుందని మోషన్ పోస్టర్ చూస్తే అర్థమవుతుంది. దర్శకుడు సుభాష్ చంద్ర తెరకెక్కిస్తున్న ఈ సినిమాతో ఫల్గుణి ఖన్నా హీరోయిన్ గా పరిచయం అవుతుంది. ఎం ఆర్ ప్రొడక్షన్స్ తో పాటు స్టోరీ క్యాట్ ఎంటర్టైన్మెంట్స్, ఎస్ ఒరిజినల్ సంస్థలు ఈ సినిమా నిర్మాణంలో పాలుపంచుకుంటున్నాయి. నాగ వంశీ సంగీతం అందిస్తున్న ఈ సినిమా, డిసెంబర్ నెలలో విడుదలయ్యే అవకాశం ఉంది.
