పెదకాపు 1 ట్రైలర్: ఫ్యామిలీ సినిమాల దర్శకుడు తీసుకొస్తున్న సోషల్ డ్రామా
దర్శకుడు శ్రీకాంత్ అడ్డాల అనగానే అందరికీ గుర్తొచ్చేది కుటుంబ కథా చిత్రాలే. కొత్త బంగారులోకం నుండి మొదలుకొని సీతమ్మ వాకిట్లో సిరిమల్లె చెట్టు, ముకుంద, బ్రహ్మోత్సవం ఇలా వరుసగా ఫ్యామిలీ డ్రామాలను శ్రీకాంత్ అడ్డాల తెరకెక్కించారు. వెంకటేష్ హీరోగా నారప్ప సినిమాతో శ్రీకాంత్ అడ్డాల తన రూటు మార్చారు. ప్రస్తుతం నారప్ప మాదిరి ఇంటెన్స్ కథతో పెదకాపు 1 అనే సినిమాతో శ్రీకాంత్ అడ్డాల వస్తున్నారు. విరాట్ కర్ణ, ప్రగతి హీరో హీరోయిన్లుగా రూపొందుతున్న ఈ చిత్ర ట్రైలర్ ఈరోజు విడుదలైంది. 2 నిమిషాల 24 సెకండ్ల నిడివి గల పెదకాపు 1 ట్రైలర్ యాక్షన్ అంశాలతో నిండిపోయింది.
ఊరి రాజకీయాలే ప్రదానాంశంగా పెదకాపు 1 సినిమా
ఊర్లో జరిగే రాజకీయాలు, వర్గ భేదాలు పెదకాపు 1 సినిమాలో శ్రీకాంత్ అడ్డాల చూపించబోతున్నట్టు ట్రైలర్ చూస్తే అర్థమవుతుంది. ఇదివరకు ఈ సినిమా నుండి ఒక రొమాంటిక్ మెలోడీ రిలీజ్ అయింది. కానీ ట్రైలర్ లో మాత్రం లవ్ స్టోరీ కి సంబంధించిన సీన్లను ఎక్కడా చూపించలేదు. పీరియాడిక్ డ్రామాగా రూపొందుతున్న ఈ సినిమాలో తనికెళ్ల భరణి, నాగబాబు, రాజీవ్ కనకాల, ఈశ్వరి రావు, అనసూయ ప్రధాన పాత్రల్లో నటిస్తున్నారు. అఖండ సినిమాతో హిట్ అందుకున్న ద్వారకా క్రియేషన్స్ బ్యానర్లో రూపొందుతున్న ఈ సినిమాను మిర్యాల రవీందర్ రెడ్డి నిర్మిస్తున్నారు. మిక్కీ జూనియర్ సంగీతం అందిస్తున్న ఈ సినిమాను సెప్టెంబర్ 29వ తేదీన థియేటర్లలోకి తీసుకొస్తున్నట్లు నిర్మాతలు వెల్లడి చేశారు.
