మహేష్ బాబు 28: ఫైట్ మాస్టర్లను మార్చేసి షూటింగ్ మొదలుపెడుతున్న త్రివిక్రమ్
సూపర్ స్టార్ మహేష్ బాబు 28వ చిత్రం త్రివిక్రమ్ దర్శకత్వంలో తెరకెక్కుతోన్న సంగతి తెలిసిందే. ఆల్రెడీ ఈ చిత్ర షూటింగ్ కొన్ని రోజుల క్రితమే ప్రారంభమైంది. యాక్షన్ సీక్వెన్స్ తో ప్రారంభమైన చిత్రీకరణ మధ్యలోనే ఆగిపోయింది. యాక్షన్ సన్నివేశాలు మహేష్ కి నచ్చలేదని అప్పట్లో వార్తలు వచ్చాయి. దాంతో త్రివిక్రమ్ మళ్ళీ స్క్రిప్ట్ కి మెరుగులు దిద్దాడని అంటున్నారు. ప్రస్తుతం అన్ని పనులు పూర్తి చేసుకుని పక్కా ప్లానింగ్ తో షూటింగ్ లోకి దిగుతున్నారట. ఈసారి యాక్షన్ సీక్వెన్సెస్ కోసం ఆన్బారివ్ లని రామ్ లక్ష్మణ్ లని తీసుకున్నారట. రేపటి నుండి సినిమా చిత్రీకరణ, హైదరాబాద్ లోని స్టూడియో ఉండనుందని చెప్పుకుంటున్నారు. ఈ షుటింగ్ లో మహేష్ బాబు పాల్గొంటున్నాడని సమాచారం.
పూర్తి యాక్షన్ కాకుండా ఫ్యామిలీ ఎంటర్ టైనర్ గా మారిన స్క్రిప్ట్
ఈ సినిమాను పూర్తి యాక్షన్ ఎంటర్ టైనర్ గా త్రివిక్రమ్ రాసుకున్నారట. కానీ అలా కాకుండా ప్రస్తుతం ఫ్యామిలీ ఎంటర్ టైనర్ గా మారిపోయిందని వినిపిస్తోంది. యాక్షన్ సన్నివేశాలకు పెద్దపీట వేస్తూనే ఫ్యామిలీకి నచ్చేలా మార్చారని టాక్. ఇందులో పూజా హెగ్డే, శ్రీలీల హీరోయిన్లుగా కనిపిస్తున్నారు. 2023లో ఈ సినిమాను ప్రేక్షకుల ముందుకు తీసుకొచ్చే అవకాశం ఉన్నట్లు తెలుస్తోంది. ఈ సినిమా పూర్తయ్యాక రాజమౌళి దర్శకత్వంలో చేయబోతున్నాడు మహేష్ బాబు. కథా పనులు పూర్తయ్యాయని, ప్రపంచాన్ని చుట్టివచ్చే ప్రయాణికుడి కథలా ఈ సినిమా ఉంటుందని రాజమౌళి ఇదివరకే చెప్పారు. అంతేగాక, ఈ సినిమా మీద ఫ్రాంఛైజీస్ కూడా వస్తాయని కథా రచయిత విజయేంద్ర ప్రసాద్ చెప్పుకొచ్చారు.
