ఇన్స్టాగ్రామ్ లోకి అడుగు పెట్టిన నయనతార: ఇంతకీ ఆమె ఎవరిని ఫాలో అవుతుందో తెలుసా?
స్టార్ హీరోయిన్ నయనతార ఇన్స్టాగ్రామ్ లోకి అడుగుపెట్టారు. ఎన్నో రోజులుగా తనకు సంబంధించిన అప్డేట్స్ అన్నీ ట్విట్టర్, ఫేస్ బుక్ ద్వారా అందించే నయనతార తాజాగా ఇన్స్టాగ్రామ్ ఖాతాను ఓపెన్ చేశారు. తన ఖాతాలో పోస్ట్ చేసిన మొదటి వీడియో అందరినీ ఆకర్షిస్తుంది. జైలర్ సినిమాలోని హుకుం సాంగ్ బ్యాగ్రౌండ్ లో ప్లే అవుతుంటే ఇద్దరు పిల్లల్ని ఎత్తుకొని ఎంట్రీ ఇచ్చారు నయనతార. తాను నటించిన జవాన్ సినిమా విడుదల వారం రోజులు ఉందనగా నయనతార ఇన్స్టాగ్రామ్ లోకి అడుగుపెట్టడం చెప్పుకోవాల్సిన విషయం. ఇన్స్టాగ్రామ్ లోకి చేరిన కొద్దిసేపట్లోనే దాదాపు రెండు లక్షలకు పైగా ఫాలోవర్లు వచ్చేశారు.
మిషెల్ ఒబామాను ఫాలో అవుతున్న నయనతార
ఇక్కడ చెప్పుకోవాల్సిన మరో విషయం ఏంటంటే, ఇస్స్టాగ్రామ్ లో నయనతార మొత్తం ఐదుగురిని ఫాలో అవుతున్నారు. అందులో తన భర్త విగ్నేష్ శివన్, బాలీవుడ్ బాద్ షా షారుక్ ఖాన్, మ్యూజిక్ సెన్సేషన్ అనిరుధ్ రవిచందర్, అమెరికా మాజీ అధ్యక్షుడు బరాక్ ఒబామా భార్య మిషెల్ ఒబామా, తన సొంత నిర్మాణ సంస్థ ది రౌడీ పిక్చర్స్ ఖాతాలను ఆమె ఫాలో అవుతున్నారు. నయనతార హీరోయిన్ గా నటించిన జవాన్ చిత్రం సెప్టెంబర్ 7వ తేదీన ప్రపంచవ్యాప్తంగా తెలుగు, తమిళం, హిందీ భాషల్లో విడుదల అవుతుంది. తమిళ దర్శకుడు అట్లీ దర్శకత్వం వహించిన ఈ సినిమాను రెడ్ చిల్లీస్ ఎంటర్ టైన్మెంట్ బ్యానర్ పై గౌరీ ఖాన్ నిర్మిస్తున్నారు.
