Kanguva: ఓటీటీ రిలీజ్ కు రెడీ అయిన కంగువ.. రిలీజ్ డేట్ ప్రకటించిన అమెజాన్ ప్రైమ్
స్టార్ హీరో సూర్య ప్రెస్టీజియస్ మూవీ 'కంగువ' దాని భారీ పీరియాడిక్ యాక్షన్ థీమ్ తో ప్రేక్షకులను ఆకట్టుకునే ప్రయత్నం చేసింది. ఈ చిత్రాన్ని దర్శకుడు శివ దర్శకత్వం వహించి, భారీ బడ్జెట్‌తో రూపొందించారు. ప్రముఖ నిర్మాణ సంస్థలు స్టూడియో గ్రీన్, యూవీ క్రియేషన్స్ బ్యానర్స్ పై కేఈ జ్ఞానవేల్ రాజా, వంశీ, ప్రమోద్ నిర్మాణం చేపట్టారు. నవంబర్ 14న ప్రపంచవ్యాప్తంగా విడుదలైన ఈ సినిమాను నైజాం ఏరియాలో మైత్రీ మూవీ డిస్ట్రిబ్యూటర్స్ విడుదల చేశారు. ఎన్నో అంచనాలతో విడుదలైన ఈ చిత్రం, మిశ్రమ స్పందనను పొందింది.
రూ. 400 కోట్ల బడ్జెట్‌తో తెరకెక్కిన సినిమా
మొదటి ఆట నుంచే ఈ సినిమాకు నెగిటివ్ టాక్ వస్తుండడంతో, మొదటి వారంలోనే థియేటర్ రన్ ముగిసిపోయింది. దాదాపు రూ. 400 కోట్ల బడ్జెట్‌తో తెరకెక్కిన ఈ సినిమా తమిళ్ బిగ్గెస్ట్ డిజాస్టర్ లో ఒకటిగా నిలిచింది. విడుదలకు ముందు ఈ సినిమా డిజిటల్ హక్కులను ప్రముఖ ఓటీటీ సంస్థ అమెజాన్ ప్రైమ్ భారీ ధరకు కొనుగోలు చేసిన విషయం తెలిసిందే. థియేటర్స్ లో ప్లాప్ అవడంతో, అనుకున్న సమయం కంటే ముందే అమెజాన్ ఈ చిత్రాన్ని ఓటీటీలో విడుదల చేయడానికి సిద్ధమైంది. డిసెంబరు 13న ఈ సినిమా అమెజాన్ ప్రైమ్ లో స్ట్రీమింగ్ కి రాబోతోంది.
రన్ టైమ్ పై తీవ్ర విమర్శలు
సినిమా థియేటర్ లో విడుదల అయిన తర్వాత, సౌండింగ్, రన్ టైమ్ పై తీవ్ర విమర్శలు ఎదుర్కొన్నాయి. ఈ అంశాలపై సవరణలు చేసి, సౌండింగ్ ను మార్చి, రన్ టైమ్ ను ట్రిమ్ చేసినా, సినిమా ప్రతిఫలాన్ని తీసుకోలేకపోయింది. ఇప్పుడు, ఈ చిత్రం ఓటీటీలో తన గుర్తింపు పొందుతుందా లేదా అనే విషయం ప్రేక్షకులు, ఫిల్మ్ విశ్లేషకులు ఆసక్తిగా చూడాలి.
