Mrunal Thakur: ఏడుస్తూ నిద్రపోయిన రోజులు ఉన్నాయి : మృణాల్ ఠాకూర్
ఈ వార్తాకథనం ఏంటి
శరీర బరువు కారణంగా గతంలో తాను తీవ్ర ట్రోలింగ్ను ఎదుర్కొన్నానని నటి మృణాల్ ఠాకూర్ వెల్లడించారు. ఆ విమర్శలు తనపై తీవ్రమైన ప్రభావం చూపాయని, తన ఆత్మవిశ్వాసాన్ని కూడా దెబ్బతీసాయని ఆమె పేర్కొన్నారు. అయితే అలాంటి వ్యాఖ్యలను పట్టించుకోవడం మానేసిన తర్వాత తనలో గణనీయమైన మార్పు వచ్చిందని చెప్పారు. తాజాగా ఓ ఇంటర్వ్యూలో మాట్లాడిన ఆమె, అక్షయ్ కుమార్ చెప్పిన మాటలు తనకు ఎంతో ధైర్యాన్ని ఇచ్చాయని వెల్లడించారు. 'ఆ రోజులు ఇప్పటికీ నాకు స్పష్టంగా గుర్తున్నాయి. ఎన్నో సార్లు ఏడుస్తూ నిద్రపోయి, ఉబ్బిన కళ్లతో లేచిన సందర్భాలు ఉన్నాయి. శరీరాకృతిపై అంతగా ఆందోళన చెందాల్సిన అవసరం లేదని నాకు నేను చెప్పుకునేదాన్ని. కానీ, దాన్ని అధిగమించడానికి చాలా ధైర్యం కావాలి.
Details
నన్ను ట్రోల్ చేశారు
అప్పట్లో నా చుట్టూ ఉన్నవారే నన్ను ట్రోల్ చేసేవారని మృణాల్ తెలిపారు. ఒక రోజు జిమ్కు వెళ్లినప్పుడు సన్నగా ఉన్న ఓ అమ్మాయి నా దగ్గరకు వచ్చి 'నేను మీలాగా మారాలంటే ఏమి చేయాలి?' అని అడిగింది. అప్పుడే నాకు ఒక విషయం అర్థమైంది. మనం ఎలా ఉన్నా మనల్ని ఇష్టపడేవారు ఉంటారు. మనల్ని మనం గౌరవించుకుంటేనే ఇతరులు కూడా మనకు విలువ ఇస్తారని చెప్పారు. అలాగే గతంలో అక్షయ్ కుమార్ తనకు చెప్పిన సూచనలను కూడా ఆమె పంచుకున్నారు. 'వేలాది మంది ట్రోల్ చేసినా వాటిని పట్టించుకోకుండా ముందుకు సాగాలని ఆయన చెప్పారు. అయితే సినిమాలో పాత్ర కోసం అవసరమైతే మాత్రం సన్నగా మారాలని స్పష్టంగా చెప్పారు.