బ్రహ్మానందం బర్త్ డే స్పెషల్: తరుణ్ భాస్కర్ రివీల్ చేసిన వీల్ ఛెయిర్ తాత క్యారెక్టర్
తెలుగు సినిమాల్లో హాస్యం ప్రధానంగా ఎక్కువ సినిమాలు వస్తుంటాయి. అందుకే తెలుగు హాస్యనటుల జాబితా పెద్దగా ఉంటుంది. తెలుగు తెర మీద ఎంత మంది హాస్యనటులున్నా ఒక్కరు కనిపించగానే అనుకోకుండానే అందరూ నవ్వేస్తుంటారు. ఆ ఒక్కరే బ్రహ్మానందం. కొన్ని దశాబ్దాలుగా తెలుగు సినిమా హాస్యానికి కిరీటంలా నిలిచాడు బ్రహ్మానందం. ఈరోజు ఆయన పుట్టినరోజు. ఈ మధ్య సినిమాల్లో బ్రహ్మానందం తక్కువగా కనిపిస్తున్నారు. కానీ మీమ్స్ లో మాత్రం రోజూ దర్శనమిస్తూనే ఉన్నారు. కళాకారులంతే, వారి కళ ఎల్లప్పుడూ అవతలి వారిని ఆనందింపజేస్తూ ఉంటుంది. బ్రహ్మానందం పుట్టినరోజు సందర్భంగా సోషల్ మీడియాలో శుభాకాంక్షల వర్షం కురుస్తోంది. అలాగే బ్రహ్మానందం తర్వాతి సినిమాల నుండి అప్డేట్లు కూడా వచ్చాయి.
పెళ్ళిచూపులు దర్శకుడి సినిమాలో తాత పాత్రలో బ్రహ్మానందం
బ్రహ్మానందం తర్వాతి సినిమాల అప్డేట్లలో ఎక్కువగా ఆకర్షించింది వీల్ ఛెయిర్ తాత క్యారెక్టర్.పెళ్ళిచూపులు దర్శకుడు తరుణ్ భాస్కర్, తన నెక్స్ట్ మూవీలో బ్రహ్మానందం పాత్రను రివీల్ చేసారు. కీడాకోలా అనే వర్కింగ్ టైటిల్ తో రూపొందుతున్న ఈ సినిమాలో సాధారణంగా ఇళ్ళల్లో కనిపించే తాత పాత్రలో బ్రహ్మానందం కనిపిస్తాడని తెలియజేసాడు. వీల్ ఛెయిర్ కు అతుక్కుపోయి వచ్చిపోయేవాళ్ళని వెటకారంతో మాట్లాడకుండా చేసి నవ్వులు పూయించే తాత పాత్రలో బ్రహ్మానందం కొత్తగా కనిపిస్తారని, ప్రేక్షకులకు మంచి హాస్యం అందుతుందని తరుణ్ భాస్కర్ చెప్పుకొచ్చారు. అలాగే క్రిష్ణవంశీ దర్శకత్వంలో వస్తున్న రంగమార్తాండ సినిమాలో ఓ కీలక పాత్రలో కనిపించనున్నారు బ్రహ్మానందం. ఈ సినిమా మరికొద్ది రోజుల్లో ప్రేక్షకుల ముందుకు రానుంది.
