నిర్మాత సురేష్ బాబుపై ప్రశంసల వర్షం.. ట్రాఫిక్ క్లియరెన్స్ వీడియో వైరల్
గొప్పవాళ్ళు కావడానికి పెద్ద పనులే చేయాల్సిన అవసరం లేదు. నిజానికి చిన్న చిన్న పనులను కూడా బాధ్యాతయుతంగా చేస్తారు కాబట్టే వాళ్ళు గొప్పవాళ్ళు అవుతారు. ప్రస్తుతం హైదరాబాద్ ఫిలిమ్ నగర్ లో జరిగిన ఒక సంఘటన పై వాక్యాన్ని నిజం చేస్తోంది. హైదరాబాద్ లో ట్రాఫిక్ సమస్య ఎక్కువగా ఉంటుంది. రోడ్లన్నీ వాహనాలతో కిక్కిరిసిపోయి ఉంటాయి. సాయంత్రం ఈ రద్దీ ఎక్కువగా ఉంటుంది. కొన్ని ప్రాంతాల్లో వాహనదారుల నిర్లక్ష్యం వల్ల ట్రాఫిక్ పెరుగుతుంటుంది. అందరికీ తొందరగా వెళ్ళిపోవాలనే ఆలోచన వల్ల ఏ చిన్న స్థలం దొరికినా అందులోకి తమ వాహనాలను దూరుస్తారు. దానివల్ల వెళ్లే వాళ్ళు వెళ్లలేక ఇబ్బంది పడిపోతుంటారు. అలాంటప్పుడు ఎవరో ఒకరిద్దరు మాత్రమే ట్రాఫిక్ క్లియర్ చేయడానికి ముందుకు వస్తారు.
ట్రాఫిక్ క్లియర్ చేయడానికి వచ్చిన సురేష్ బాబు
ప్రస్తుతం అలా నిర్మాత సురేష్ బాబు వచ్చారు. హైదరాబాద్ రోడ్ల మీద ట్రాఫిక్ క్లియర్ చేయడానికి ముందుకొచ్చారు. ఈ సంఘటన ఫిలిమ్ నగర్ లో జరిగింది. నిన్నరాత్రి ఫిలిమ్ నగర్ లో ఒక సర్కిల్ దగ్గర ట్రాఫిక్ ఏర్పడింది. అది క్లియర్ కావాలని అందరూ హారన్ కొడుతూ ఉంటే అక్కడే కార్లో ఉన్న సురేష్ బాబు, కార్ లోంచి దిగారు. వాహనాలకు సూచనలు చేస్తూ ట్రాఫిక్ క్లియర్ చేసారు సురేష్ బాబు. ఆయనతో పాటు మరికొంత మంది వచ్చి సాయం చేసారు. సురేష్ బాబును గుర్తించిన జనాలు కార్లలోంచి హాయ్ చెబుతూ చేయి ఊపారు. మొత్తానికి కొద్దిసేపట్లో ట్రాఫిక్ క్లియర్ ఐపోయింది. ఈ సంఘటనకు సంబంధించిన వీడియో ఫుటేజ్ బయటకు వచ్చింది.
